CBI consent pek danah danglam a awm ngei – CM

CBI hnena general consent pek danah an sawrkar hnuaiah danglam bik chu a awm ngei a, venthawn neih erawh a ngai tih chief minister Lalduhoma chuan a sawi.
Nilainia Assembly Session neihah Vigilance changtu chief minister chuan, central-ah eng party emaw an sawrkar a, state ah party dang an sawrkar a, state-a an party er zawng tak sawrkar kha tihchhiat duh ta se, state sawrkar hnuaia thawk an duh duh kha rawn chhuiin rawn khawih ta se, sawrkar a intihchhiat theih dawn tih a sawi a. Chu chu tuna central-a BJP sawrkarin West Bengal-a hma a lak danah pawh a thleng mek tia sawi theih a ni tih a sawi.
An sawrkar ve leh an ngaihpawimawh avangin CBI hnenah consent an pe a, MNF sawrkarin a pek dan nen a danglamna a awm lo nia sawi awm bawk mah se, MNF sawrkar chuan consent an pe loa, an ni chuan an pe nghal tih a sawi. Criminal law thar hman a nih hnu ah hei a ‘valid’ ta lo vek a, consent pek that leh a ngai, tiin a form dahkhah tur an duansa hmangin an chhang a, a kar awl awm loin general consent an pe zui tih a sawi a ni.
“A hmingah chuan ‘general consent’ a la ni reng a, state sawrkar hnuaia thawkte a huap ta lo a ni. Tu pawh sawrkar se, hei bak hi kan ti thei lo. A nih ang hian pawm ila, inhnialna tur a awm lo. Amaherawhchu kan investigating agency – Lok Ayukta, Anti Corruption Bureau ten CBI-ah pek ni rawh se, tia an rawtna chu keini chuan remtih zel kan tum,” chief minister hian a ti.