Central scheme umzui chak a ngai – Chief minister

Central scheme umzui chak a ngai
– Chief minister
Central scheme kalpuinaah umzui chak a ngai a, sakuh ser nghah chi a ni lo tih chief minister Lalduhoma chuan a sawi.
State Level DISHA Committee (SLDC) chu an chairman, chief minister Lalduhoma kaihhruaiin Thawhtanni khan an thukhawm a. Sawrkar laipui scheme sum hman dan leh inpek dan kalphung thar SNA-SPARSH hman hnuah sawrkar kumtawpa account ti zero thei lo department an awm avangin harsatna an tawk a. Chutiang chu awm tawh lo se an duh avanin an zaa tan tlang a ngai tih a sawi.
Central scheme kalpuitu department-ten thawhho an thiam a, a remchanna apianga an inthlunzawm (converge) chuan hmalakna a chak a, an hlawhpui zawk thin tih a sawi a. Tunhnaiah Irrigation & Water Resources department-in kum rei tak chhunga sawrkar laipui pek theih loh fund an hnuh chhuah vek avangin an chungah an lawm tih a sawi bawk.
“Central scheme kalpuinaah lehkha thehluh umzui chak a ngai a. Sakuh ser nghah mai chi a ni lo. Chief minister DO letter thawn a tul chang a awm a. Inthlahrung loin rawn hriattir thuai ula, ka lo bawhzui ang. MP Pu Richard Vanlalhmangaiha pawh a inhawng em em tih kan hre dawn nia,” a ti.
Central scheme thawk department hrang hrangin kum 2025- 2026 a hma an lakna leh hlawhtlinna thlirho a ni a. Chief minister hmalaknaa Mat Multipurpose Dam buaipui mek cheng vaibelchhe 274 senna tur project duanfel a ni tih sawi a ni. Ruahman dan chuan, tuikhuah hi metre 29-a sang, hectare 700-a zau leilet chawm thei, power siamna awm, eco-tourism kalpui theihna tura duan a ni a. Brahmaputra Board-in a thawhna tur sum a dap dawn a ni.
SLDC-ah hian Rural Development minister Prof. Lalnilawma chu co-chairman niin, RD secretary chu member secretary a ni a. Member ah Lok Sabha MP Richard Vanlalhmangaiha, Rajya Sabha MP K Vanlalvena, MLA – K Laldawngliana, K. Hrahmo, T Lalhlimpuia, Lt. Col. Clement Lalhmingthanga leh Baryl Vanneihsangi, central scheme kalpuitu department 30 hotute leh mimal leh tlawmngai pawl aiawh ruat bikte an tel.
DISHA thutkhawma sawi leh rel:
8 Report a tarlan danin, MGNREGA hnuaiah (household) 62193 in ni 100 inhlawhna an thawk. Sawrkar laipui chuan he scheme hi VB GRAMG tia a thlak dawn avangin a kalpuina tur Mizoram Scheme duanfel a ni tawh a, cabinet thukhawmin a ngaihtuah tura thehluh a ni.
8 PMAY G 2.0 kalpuina turin Mizoramah survey neih zawh a ni tawh a. Chhungkaw 54601 chu he tanpuina dawng thei tura ngaih an ni. PMAY-G sum central-in a pek dan hi Mizoram kalphung nen a inmil tawk lo nia ngaih a ni a. A guideline siamtha tura dil nise, an ti.
8 SAGY (Model Village) hmalakna chu engkim thawh zawh a ni tawh a. Khar tura sawrkar laipuia lehkha thawn tawh niin, SAGY scheme thar a awm tawh dawn lo nia hriat a ni.
8 AH & Vety-in National Livestock Missions hnuaia animal insurance a kalpui mek a. Mi 700 velin insurance an ti tawh. Chu chu ti tura beisei zat atanga zaa 10 vel chauh an ni a, uar zawka inhrilh darh nise, an ti.
8 National Health Missions report-a a lan danin, sawrkar kum kalta chhunga nu naupai inziaklut 20137 an ni a. Damdawi ina nau nei (institutional delivery) 17201 an ni. Nau piang hlim thi 285 an awm a, Infant Mortality Rate (IMR) 15 a ni a, 16 aia hniama awm hi target mek niin, target hi hlen a ni.
8 Planning & Programme Implementation report-a a lan danin, Mizoramah Ministry of Tribal Affairs hnuaia hmasawnna hnathawh 82 a awm mek a, NESIDS (OTRI) hnuaiah project 19, NESIDS (Road) ah project 11 leh NEC ah project 48 a ni. Heng bakah hian ruahmanna thehluh mek engemawzat a awm bawk.