Centre-in issue base-in min enkawl – K Hrahmo

Centre-in issue base-in min enkawl
– K Hrahmo
ZPM sawrkarin centre-a BJP kaihhruai sawrkar chu ‘issue base’ a thlawp an tum thu an sawi ang bawkin, centre hian ‘issue base’ in min enkawl ve nia a lan thu BJP MLA K Hrahmo chuan a sawi.
Thawhtannia BJP office-a inkhawmah K Hrahmo chuan, MNF-in NDA inti chung siin, NDA tak taka an inhnim phum duh loh zia a chiang tawh tih a sawi a. Sawrkarna an siam lai khan NDA-a awm tak tak nise, Mizoramah khatianga harsatna nasa kha kan tawh a rinawm loh tih a sawi.
“Tuna an awm dan en chuan NDA-ah hian an inhamtang hram hram a ni ber a, an kut a kham huna tlak thlak tawp thlenga awm an tum ni berin a lang. Bible-in ‘i lum leh lum la, i vawh leh vawt rawh’ a tih ang hian political party-te hi kan kal a ngai,” a ti.
Tun sawrkar pawh NDA-a tel tura central hruaituten ZPM an dawr lai khan an zawm duh loa, vawiinah chuan chumi rah chu kan seng mek niin BJP MLA hian a sawi. “Issue base-in kan kal dawn, an tih ang khan issue base chuan an kal ta a, chutiang bawkin central pawh hian issue base thoin min enkawl niin a lang. Mizoram hian central base-a kan kal ve theih hun a nghahlelhawm a, chumi hnuah chuan kawng hrang hranga harsatna kan tawh hi a kiam tawh ang,” a ti.
India ramah national party paruk vel an awm a, a dang zawng chu regional party an ni a. Tunah hian national party BJP atang lo chuan development a awm thei lo tih kan hrechiang ta hle tih a sawi bawk.