Centre leh state sawrkar kalpui scheme hmang tangkai turin duh

On Nov 11, 2024 15 0

Centre leh state sawrkar kalpui scheme hmang tangkai turin duh
Industry kaihhnawihah sawrkar laipui leh state sawrkarin scheme a kalpui ho chu hmang tangkai deuh deuh turin a duh tih Commerce & Industries minister F Rodingliana chuan a sawi.
Thuchah a siamah Commerce & Industries minister chuan, Raising and Accelerating MSME Productivity (RAMP) chu sawrkar laipui scheme lian tak niin, kum 5 chhung kalpui tura ruahman a ni a. He scheme hi Strategic Investment Plan (SIP) an siam – ‘MSME Elevated Mizoram’ an tih hmanga kalpui tur a ni tih a sawi. He scheme atan hian sawrkar laipuiin cheng vaibelchhe 37.36 hman phalna a rawn pe tawh a. State Programme Implementation Unit kaltlangin chak taka hma lak mek a ni tih sawiin, “RAMP hi MSME leh Handholding Scheme nen kaihkawp tur a ni a. Directorate of Commerce & Industries-ah MSME Facilitation Cell pawh dinfel tawh a ni,” a ti.
Pradhan Mantri Formalisation of Micro Food Processing Enterprises (PMFME) ah eitur siam, chhang siam, pickle siamna lama hma latute tan chuan ‘Lei Manna’ dik tak a ni tih minister hian a sawi. He scheme hi self help group leh mimal, helama hma la te tan hman tangkai theih a ni, tiin, cheng nuai 10 loan a lak theih a, central subsidy hi nuai 3.5 a ni a, rulh tur chu nuai 5.5 a ni tih a sawi.
Sawrkar lai pui chuan India hmarchhaka chengte dawmkanna atan scheme thar – UNNATI Scheme siamin, hemi hnuaiah hian dan ang thlapa hma lak chuan senso zaa 50 chu sawrkarin a rul let leh dawn a; chutihrualin he scheme hmang tur hian cheng nuai 50 tal hmatheh (invest) ve a tul tih a sawi. Mizoram bika sawrkar laipuiin sum a dah chu cheng vaibelchhe 453 niin, diltu tam dan azirin hei tihpun theih a ni Industries minister hian a sawi.
Handloom, handicraft, textiles-a National Handloom Development Programme chu sawrkar laipuiin kalpuiin, Mizorama puantahtu ten tangkai takin an hmang mek tih a sawi a. Heng zingah hian
Cluster pahnih – Thenzawl leh Chhiahtlang tan cheng nuai 142.458 hmuh a ni tawh a. Thenzawlah phei chuan mi 46 hnenah nuai 1.2 theuh sem a ni tawh tih a sawi a ni.
Hei bakah hian Mizoram Handloom Multi Marketing Complex (Zo-Mart) chu Chaltlang Aizawlah cheng vaibelchhe 9.98 senga sak tum niin, ministry-ah ruahmanna siam hi thehluh tawh a ni a, tih a sawi bawk.