CESJ-in OSD to CM ruahmanna ringhlel Corporate lian ho lakah fimkhur an duh

Environment leh social activist ho telna pawl CESJ chuan Mizorama corporate lian ho lo luh tumnaah officer on special duty to chief minister chu thuk taka inrawlh nia an ngaih thu sawiin hemi laka fimkhur turin sawrkar an duh tih an sawi.Centre for Environment & Social Justice (CESJ) chuan, tunhnaia Indian mi hausa Anant Ambani ta – Vantara private zoo chungchanga Mizoram sawrkar hotu thenkhat rawn thlunzawm an tum danah rinhlelh leh hlauhthawn an neih thu an lo sawi tawhna an chhuizui zelnaah a meizanghlaptu ber nia an hriat OSD to CM hmalakna chu, RTI dan hmanga an zawhin Chief Minister’s Office pawhin he a hmalakna hi an hriatpui loh thu in an chhang tih a sawi.
Heti a nih chuan OSD to CM hian sawrkarin he post a chelh tirnaa hna a thawh dan tur terms & conditions a siamnaa lang tel lo, CMO hriatpui lohin Reliance Foundation enkawl Vantara Zoo inkarah hian ruahmanna siamin palai hna (dalal) a lo thawk kual vel tihna ni ber nia a lan thu a sawi a ni.
Reliance Foundation vek hi ruihhlo dona atana Central YMA hnena lirthei pakua petu niin, heath pawh hian OSD to CM hi ama enkawl NGO kaltlangin a inrawlh niin CESJ hian a sawi a. Hei hi Mizorama kua an hreuh theihna tura kawng sial lawkna a nih ngei an rin thu leh, sawifiah tul nia an ngaih a ni tih a sawi bawk.
‘A kaihhnawih department minister leh thawktute pawh ni lo, RD minister leh Vantara Zoo aiawhte nature reserve, afforestation leh community reserve chungchang hmalakna tur ruahmanna an neih ho theihna atana a lo thlunzawm kual daih mai hi hriatthiam a har,’ a ti.
‘Kan ramngaw, lui tui, ramsa leh sava chi hrang hrang humhalh kawngah Mizoram sawrkar leh mipui tha tichak lehzuala thawhpui tur kan mamawh a nih pawhin, India leh khawvel huap pawha helama hming tha lo tak, dan pawisak nei lo, Reliance- Vantara ber kher chu thawhpui lo hram turin thuneitute kan ngenin kan phut a. Environment humhalh leh renchem lamah heng multi-billionaire te hian kan ram zimteah tih tur an nei lo,’ a ti bawk.
Hetiang mi hian CMO leh Mizoram sawrkar ngei pawh, sumdawng lianten an duh duha an her danglam kual theih sawrkar – corporatocracy /plutocracy ah a hnuk lut ang tih an hlau hle tih CESJ hian a sawi a. ‘Heng corporates lian tam ber hian engtik lai mahin khawi hmunah pawh mipui hamthatna an ngaihtuah lo a. Anmahni hlawkna chiah an um tih hi khawvelin a hria a. An donation leh charity tam tak pawh an business atana hlawkna hmuh letna hmanrua deuh vek a ni,’ a ti.
Hei hi India rama environmental movement lian tak tak thleng tawhte thlirletin, mi hausaten an hausak belh zelna tura miretheite tangka tlemte te pe a, an chenna atanga an nekchhuah rah deuh vek a ni tih a sawi a ni.
‘A pawi ber chu, corporatocracy-ah chuan ram leh hnam hmangaihna a bo a. Tun huna mihring nun khawchhuahna atana pawimawh pahnih – environment leh social/ collective good mausama sum lama hlawkna chauh ngaihtuah hi kan hmu thiam lo a nih chuan a pawi ang. A nghawng tur chu mi tlemte in ram leilung hausakna suasama hlawkna an tel a, retheite an beh zualzelna tur leh environment chereu vanga harsatna hrang hrang a ni,’ a ti.