Chad president pisa beih tum 19 that

Ralthuam kengten an khawpui, N’Djamena-a presidential complex luhchilh tuma an beihnaah Chad venhim hna thawktuten mi 19 vel an that.
Nilaini zana president pisa beih tum mi 24 zinga 18 vel thah an ni tih sorkarin a sawi a, venhim hna thawktu pakhat a thi tel ve bawk.
“A beitu mi 18 an thi a, paruk an hliam a. Venhim hna thawktu zinga pakhat thiin parukin hliam an tuar ve bawk a, an zinga pakhat hi a na hle,” tiin Chad foreign minister leh sorkar thupuangtu, Abderaman Koulamallah chuan a sawi.
Inbeihna a thlan atanga darkar reilo teah Koulamallah hi video-ah lang nghalin sipaiten an hual a, amah pawhin a kawngah silai a pai a, “Engkim thunun tawh a ni a, sorkar tihnghin tumtute chu dah that an ni tawh,” a ti.
Beihna hi China Foreign Minister Wang Yi-a’n Chad a tlawh lai tak a ni.
Inkahna a thlen hma lawk hian Wang Yi hian Chad President Mahamat Idriss Deby leh sorkar mi pawimawh dangte a kawm nghe nghe.
Koulamallah chuan presidential complex beih a nih lai hian Deby-a hi a awm niin a sawi.
He thil thlen hnuah hian China foreign ministry chuan Chad hi an ram himna tura a beihnaah a thlawp tlat thu an sawi nghal.
Tih dan thin pangngai anga thuthar lakhawmtute a kawmnaah Chinese foreign ministry thupuangtu chuan Wang-a’n African ram a tlawh hi a zo tawh tih a sawi.
Deby hian an president ni rei ber, a pa, President Idriss Deby-a chu kum 2021-a helhovin an thah hnuah thuneihna a chang zui a. Deby upa zawk hian Chad hi kum 1990 chho vel atang helna nena thuneihna changin a kaihruai tan a ni.
Venhim hna thawktuten AFP news agency hnenah president chenna beitute hi Boko Haram an ni tih an sawi a, Koulamallah erawh chuan a hnuah ‘an ni lo mai thei’ a ti leh.
Venhim hna thawktute chuan Reuters news agency hnenah he beihna hi ‘mi firfiakte beihna’ ang chi a nih thu an sawi.
“Lirthei pathuma chiangten president pisa bula sipai camp pathum an bei a; mahse, sipaiten an lo that a ni,” tiin an sawi.
Mi chengte chuan thil puak ring tak tak leh silai ri an hre nasa hle tih an sawi.
Beihna hi Chad ram inthlanpui atanga chawlhkar hnih awrh liam taa thleng a ni a, he inthlan hi sipai rorelna tihtawp tuma ke penna a ni a; mahse, vote thlak an tlem hle a, eptute chuan nasa takin vote tihchingpen niin an sawi bawk.