Los Angeles-ah ram kang a nasa, thelh a hautak tak zet

United States-a Los Angeles chu ram kang nasa takin a tibuai mek a, thli chak tak thaw leh boruak ro lutukin a pui nasa a, a thelh pawh a tihautak zual hle.
Kang thelhtuten khawi lai mah an la thelh mit thei lo va, fire thuneitu pakhat chuan Ningani khan an inman kai chak hle a, ‘khawilai mah’ an la thunun thei lo tih a sawi.
A kang lian ber, Pacific Palisades huam chhung, mi lar tam tak chennaa mi chuan in tam tak kang chhe tawhin Los Angeles ram kang chanchina thil tichhe nasa ber a ni tawh a. In 1,000 chuang a chhe tawh.
Nilaini khan Hollywood Hills an tih, khawvel pum hriat hlawha Hollywood tih intarna laiah kangmei a chhuak thar bawk.
Tunah hian hmun sarihah ram kang hi beih mek a ni.
Palisades fire hi Thawhlehni chawhma dar 10:30 (India-a Nilaini zing dar 12:00) velah a chhuak tih hriat tan niin minute 20 vel chhung lekin acre 20 atangin 200-a zau a kang hman a, Nilaini zan kha chuan acre 16,000 a kang hman tawh a. Mi 30,000 vel hmun danga insawn tura tih an ni.
Eaton fire pawhin darkar ruk chhung lekin acre 1,000 a kang kai hman a. Pasadena chunga tlangram, Altadena atanga Thawhlehni tlai dar 6:30 atanga chhuak tan kha a ni a. Nilaini zan kha chuan mi paruk thihna thlen tawhin ram acre 10,000 chuanga zau a kang tawh.
San Fernando hmar lam hretah Hurst fire a awm bawk a. Nilaini zan dar 10:10 vel atanga chhuak niin acre 850-a zau a kang tawh niin tual chhung thuneituten an sawi a. A bul hnai, Santa Clarita-a veng eng emaw zata chengte chu insawn chhuak tura tih a ni.
Woodley fire chu Woodley Park-ah Nilaini zing dar 6:15 vel atangin a chhuak tan a. LA Fire Department (LAFD) chuan hei hi chu an thunun thei tan niin an sawi.
Los Angeles hmarthlanga Ventura County-ah Olivas fire a chhuak bawk a, acre 11 chuang kang tawhin thelh theih a ni tawh.
Los Angeles hmar lama Acton tlangramah Lidia fire chu Nilaini chawhnu dar 2:00 vel khan a chhuak bawk a, acre 350 a kang tawh a. Nilaini zan dar 9:00 khan 40% vel thunun tawh a ni.
Sunset fire pawh Hollywood huam chhung, Hollywood Hills-ah Nilaini tlai dar 6:00 vel atangin a chhuak a. Acre 50-a zau kang tawhin a enga mah thelh theih a la ni lo.
Palisades fire hi a kang kai chak hle a, Thawhlehni chawhnu dar 2:00-a acre 772 kang chu darkar li chhungin a letin a kang zau hman.
Mi sang tel hmun hima insawn tura tih niin kang thelhtu mi 1,400 chuangin an bei mek.