Chak zawka court case chinfel theih dan turah inrawnkhawm

Crime Review Commitee & Under Trial Review Commitee, Champhai Judicial District chu an chairman, District & Sessions Judge Liansangzuala kaihhruaiin Zirtawpni khan an thukhawm a. Champhai Judicial District huamchhunga case hrang hrang chak zawka chinfel a nih theihna’na hmalak tulte leh thubuai ngaihtuah mek – under trial chungchang ngaihtuahin an inrawnkhawm.
District & Sessions Judge chuan Crime Review Meeting chu Gauhati High Court-in a ngaihpawimawh thu leh Under Trial Review Commitee chu Supreme Court order anga legal services hnuaia tih tura siam a nih thu a sawi a. Dan awmsate a taka hmangin pawikhawihna thleng tur engemawchena dan theih a ni, tiin, chiang zawka dan kan hmelhriata kan chhawr tangkai a tul tih a sawi. Dan loa thil tih do leh pawikhawihtute dan hnuaia hrem an nih theihna’na hmalak tlanna tur duan leh, thuneitu sang zawk hnena a tul angte thlen a pawimawh thute, an chungthu ngaihtuah mek lung ina khungte enkawl leh an hmakhua thlenga ngaihtuah pui a tul thu te a sawi bawk.
District magistrate James Lalrinchhana chuan thutkhawm buatsaih chu district pahnih tana bung thar kaina a ni, tiin, “Judiciary leh executive system-te tanho thiam a pawimawh a, heng zinga pakhat a chak loh chuan a khingbai dawn a. Kan tanrualna avangin hmasawnna leh mipui ralmuanna a awm thei dawn a ni,” a ti
Thutkhawmah hian Champhai Judicial District huamchhung chu India ram chhunga ruihhlo tawlhluhna kawng langsar tak, ruihhlo tawlh thahnem tak man a nih thin thu sawi a ni a. Ruihhlo do kawnga ram pum venhim kawnga daido leh ralveng hmasatu a nih avangin a tha tih chak a pawimawh tih sawi niin, Champhai Judicial District hnuaia thawktu indaihlohna hnawhkhah theih dan turte, Excise Outpost neih dan tur leh thil tisualtu hmeichhia an awm changa buaipui thei force lama thawktu hmeichhia mamawh belh a nih dan thuneitu sang zawkah thlen nise, an ti. Directorate of Prosecution siam a tul thu pawh thlen tha an ti a. Khawzawlah chief judicial magistrate thutchilh court din tura hma lak mek a nih thu sawi a ni.
Dan loa sumdawnna, ruihhlo tawlhruk leh manah, pawikhawihtute chunga dan hnuaia hremna lekkawh a nih theihna’n, seizure memo leh expert opinion siam zel a pawimawh thu leh, tihral dawnin dilna siama court order hmuh fel hnua hmalak a him thu tarlan a ni a. Trial kal lai mek tihral dan tur pawh sawiin, hmalak dan tur sawiho leh nise tih a ni. Thuneitute atanga dan leh thupek chhuah palzuttu leh dan loa thilti manten dan hnuaia an phu tawk hremna an hmuh theihna’na a tira bawhzui tul leh thiam an chan lohna’na hmalak tul te sawi a ni a. Rukruk tam lutuk laka hmalak tulte sawiin, rukru bakah thil ruk leitu thlenga hremna pek an nih theih nana tulte sawiho a ni.
Jail tawt lutuk tih ziaawm nana hmalak theih dante sawi niin, jail tawt dan ngaihtuah chung leh tangte case neih dan thlir chungin, an chungthu ngaihtuah chian leh tulte sawi a ni a, an case neih dan zirchian a ni. Medical examination, consumer rights venhim, Foreigners Act, Child Welfare Committee, Juvenile Justice Board leh hmalak ngaihna tul dangte sawiho a ni bawk.
He huna tarlan danin, tun dinhmunah District Jail-ah an chungthu ngaihtuah mek – under trial prisoner (UTP) mipa 100 leh hmeichhia 13, an vaiin mi 113 an awm a. An chungthu ngaihtuah fel tawh mipa 21 leh hmeichhia 2, an vaiin mi 23 an awm mek.