Champhai district-a bank hrang hrang kaltlanga financial year 2022- 2023 March quarter tawp thlenga hmalakna thlirletin Ningani khan District Consultative Committee chu an chairman, bawrhsap James Lalrinchhana hoin an thukhawm a. Champhai district RD Block pahnih huamchhunga bank leh stakeholder-te hmalakna thlirho a ni.
Report danin, March 2023 quarter chhunga Champhai district-a bank hrang hranga pawisa dahluh leh pekchhuah zat inthlauh dan khaikhinna, Credit Deposit (CD) Ratio chawhrual chu zaah 66.68 a ni a, quarter hmasa December 2022 tawpa CD Ratio 74.56% aiin 7.88% in a tlem a; hei hian CD ratio tha ni tura hniam lam bituk zat 60% a khum tho a ni. Hemi hun chhung hian bank-ah cheng nuai 52399.23 dahluh a nih laiin bank-in sum a pekchhuah chu nuai 34942.40 a ni.
2022- 2023 sawrkar kum tawp thlenga Annual Credit Plan hnuaia hnathawhte thlirho niin, priority sector atana target 10213 (cheng nuai 21446.75) atangin 6168 (nuai 10171.16), 47.42% tih hlawhtlin a ni a. Non priority sector-a target 159 (cheng nuai 3300) atangin 892 (nuai 5551.53), 168.19% tih hlawhtlin a ni. PMMY kaltlangin Sishu hnuaiah mi 42, Kishore hnuaiah 194, Tarun hnuaiah 59, Stand up India hnuaiah 3, an vaiin mi 298 hnenah loan cheng nuai 1248.63 hu pek a ni.
2022- 2023 tawp thlenga Social Security Scheme hnuaia inziaklut tawh chu, PMJDY-ah 23520; PMJJBY ah 14571 awmin, hamthatna dawng thei tur 42847 atangin inziaklut nawn 6418 an awm. PMSBY hnuaiah inziaklut tawh 38367 awmin, hamthatna dawng thei tur 55783 atangin inziaklut nawn 11448 an awm a; APY ah 1041 an inziaklut tawh bawk. Hemi hun chhung vek hian priority sector hnuaiah Non Performing Assets (NPA) cheng nuai 2968.04 (13.84%) leh non priority sector hnuaiah NPA nuai 245.89 (1.74%) awmin bank chhawr tangkai dan inzirtirna Financial Literacy Campaign tum 73 neihah mi 2894 chuang bank chhawr tangkai dan zirtir an ni.
Lead district officer, RBI Aizawl manager Siddharaj chuan banker kalkhawmte chu Financial Literacy Campaign neih hunah scheme pawimawh sawifiah mai duh tawk loa, mipuiin a taka scheme an chhawr tangkai theihna’na lehkha bawhzui tul leh hnathawhna hmanrua kenga tih sak nghal zel turin a chah.
Tuipui khuaa banking service tihchangtlun dan tur ngaihtuahho a ni a, HDFC Bank lam inhuamna lawmawm tiin, hemi kaltlanga business correspondent dah a nih theihna’n hma lak nise an ti.
Financial year 2022- 2023 March quarter tawp thleng khan Champhai district-ah bank branch hrang hrang 18 a awm a ni.
Champhaiah CD Ratio ziaawm
Get real time updates directly on you device, subscribe now.