Champhaiah silai inkahsiak
Champhai District Level Fire Prevention Committee leh Chawnchhim Rifle Club (CRC) tangdun buatsaihin kangmei ven leh nungcha humhalh kawnga inzirtirna pualin Champhai District Shooting Competition 2023 chu Inrinni khan Zote Playground-ah ‘Thapui thawhin kangmei i veng ang u’ tih thupui hmanga huaihawt a ni.
A hawnna hmanpuitu Champhai district bawrhsap James Lalrinchhana chuan kan ram sik leh sa nasa taka a danglam thu leh nungcha, thing leh mau an chereu nasat thu sawiin, fimkhur loh vangte, tih luih leh tih palh avanga ram kang thin chuan ramngaw bakah nungchate chena a suat nasat avangin kangmei ti chhuak lo tura fimkhur a ngai hle tih a sawi a. Ram venhim kawngah leh a chhunga cheng nungchate duat taka enkawl kawngah hmasawn tuma ngaihtuahna thar seng turin a chah.
Silai kawlte chu license an neih chhan leh sawrkarin an chunga rinna a nghah chhan hrereng a, mawhphurhna an neihte rinawm taka zawm turin a fuih a. Diklo taka hman leh midang hawhtir te, nungcha suat leh tualthah nana hman a nih loh nana fimkhur turin a chah. Silai kah themthiamna chu nungcha suatna’n ni lo, mahni leh midang venhimna’n leh shooting sports atana hman tangkai tum turin a chah a ni
Intihsiak hi category thumah neih niin, category hrang hranga tel hi an vaiin mi 174 an ni.