Champhaiah State University dah phut An MLA-te ban huam ngam turin ngen

Champhaiah State University dah phut
An MLA-te ban huam ngam turin ngen
Champhaia tlawmngai pawl intelkhawm chuan Champhai emaw Mizoram khawchhak lamah State University Eastern Campus dah ve an phut tih an sawi a. Lunglei district MLA-ten ban huama an tan nat ngam anga tang na ngam ve turin an district-a MLA-te an beisei tih an sawi bawk.
Champhai Joint NGO Committee hruaitute chuan, Champhaiah emaw khawchhak lam hrim hrimah national level emaw state level emaw huap eng educational institution mah an la nei ve loa, Lunglei chu population-ah pawh Champhai aiin a tam viau hran tawh loa; Lunglei chuan MZU Southern Campus awm turin approval an nei tawh a, Polytechnic leh Industrial Training Institute an neihna a rei tawh a, Mizoram Engineering College awm bawkin kumin atanga class tan tum a ni tih an sawi.
Hetiang a nih lai hian, Champhai leh khawchhak lamin ngaihsak a hlawh lo lutuk chu thil dik niin an hre lo tih sawiin, “Champhaiah State University Eastern Campus dahin, pro vice chancellor-in thutchilh se, hei hi nakin zelah National Education Policy 2020 hmalakna atan a tangkai dawn a, State University hi Lungleiah a awm dawn a nih chuan, Lunglei kal kher loa, basic level paper work tal pawh Champhaiah a tih ve theih dawn a ni. Lungleia Mizoram State University dah a nih theihna tura an MLA-te ban huama an tang ngam ang khan, Champhai district MLA-te pawh an tan nat ngam kan beisei a ni,” MZP Champhai Hqrs. president Lalruatdika chuan a ti.
Champhaia Mizoram State University Eastern Campus dah tura an ngenna chu a rem rih lo a nih pawhin, Govt. Champhal College-a stream pali – Arts, Commerce, BCA leh Science zirna awm mekah post graduate zirna tal sawrkarin dah turin an ngen tih an sawi a. PG zirna hi faculty pek belha hawn theih reng a ni a, a hmunhma a rem em em bawk tih an sawi a ni.