Champion lai Alcaraz a chak awlsam

Thawh tan zana khel tan tak US Open 2023-ah nilai zing khan champion lai Carlos Alcaraz Carfia a inlan a, a khingpui Dominik Koepfer a inhliam vangin Alcaraz hian awlsam takin hnehna a chang. Thawhleh zana inkhel dangah mipa lamah player langsar Daniil Medvedev leh Alexander Zverev ten hnehna an chang bawk.
Champion lai leh champion leh tura rinkai ber Carlos Alcaraz hian thawhtan zing khan German player Dominik Koepfer a hmachhawn a, tha takin bul a tan. Spaniar hian set khatnaah break a nei zawn a, game hnih chauh hloh chungin set hmasa a la. Set hnihnaah a inhnehtawk chho tan viau a, inkhel hmuhnawm zawk an lantir. Set hnihnaah hian Alcaraz-a’n 3-2 in hma an hruai leh hman. 3-2 hma a hruai lai mekin a khingpui Koepfer hian a ngalrekah hliam a tuar a, a inlan zui thei lo. A khingpui a inlan zui thei tak loh vangin Alcaraz hian awlsam takin second round a lut zui ta a ni.
A khingpui Dominik Koepfer a inhliam vanga awlsam taka a chak hnuin Alcaraz chuan khel tha a intih thu a sawi a, a khelh danah a lungawi thu a sawi. Champion lai Alcaraz hian, “first round-ah chuan tha teh vuta a inlan theih ka inbeisei chiah lo va, ka rin lawk ai daihin ka khel tha a, lawmawm ka ti khawp mai. Ka khelh that zui zel theih ka beisei”, a ti.
Awlsam taka Alcaraz a chak lai hian a hmaa ding thei tur zinga mi Daniil Medvedev pawhin awlsam takin hnehna a chang ve bawk. Kum 2021 champion Medvedev hian second round lut tura Attila Balazs hneh nan minute 74 chauh a mamawh a, Hugarian lakah a khel tha vet vet hle. Medvedev hian set khatna leh set hnihnaah game khat ve ve chauh a hloh a. Awlsam taka set hnih a lak zawn hnuin set thumnaah game zawng zawng a la fai vek a, awlsam zual zawkin set a la zui leh. Tichuan, minute 74 chhung lekin a khingpui Attila Balazs chu 6-1, 6-1, 6-0 a hnehin second round a lut ta a ni.
2021 final-ah Novak Djokovic lo sawp tawhtu Medvedev hian Djokovic leh Alcaraz boruak lian tak chu a lungkham lem loh thu a sawi a. A theihna sang ber nen inlan a, a tawp thleng turin game-ah chiah a insawr bing a. Player dangte chet dan a helhkam lem loh thu a sawi bawk. Medvedev hian Christopher O’Connell a hmachhawn zui leh ang. Awlsam taka Medvedev a chak lai hian a hnampui 11th seed Karen Khachanov chu American Michael Mmoh lakah 6-2 6-4 6-2 in a tlawm ringawt thung.
Mipa lama inlehthalna lian thlentir thei tur zinga mi Alexander Zverev chuan a khingpui Aleksandar Vukic chu 6-4 6-4 6-4 a hnehin second round a lut a. Italian sixth seed Jannik Sinner chuan 6-3 6-1 6-1 in a khingpui Yannick Hanfmann a vaw tla a. Sinner rual hian Italian Matteo Berrettini chuan a khingpui Ugo Humbert chu 6-4 6-2 6-2 in a hneh ve bawk.
Player langsar ten awlsam taka hnehna an chan lai hian 19th seed Grigor Dimitrov chuan harsa takin hnehna a chang ve thung. Dimitrov leh a khingpui Alex Molcan lakah harsa takin tlawm a pumpelh hram a, match point vawi thum ngawt a save hnuin 6-7 (9-11) 6-7 (5-7) 6-1 7-5 7-6 (11-9) in a chak a, second round-ah veteran player dang Andy Murray a hmachhawn zui leh ang.