Champion lawmna’na totoo chhut belh tur Vondrousova

Champion lawmna’na totoo chhut belh tur Vondrousova
Karliamta Inrinni zanah seed luah pha lo zinga Wimbledon women’s title la hmasaber ni turin Czech Marketa Von-drousova chuan final-a a khingpui Ons Jabeur lakah 6-4 6-4 hnehna a sualchhuak a, rinkai lo zawk Prague khaw tuiliak hian Tunisian hneha a champion lawmna chi khat atan a ban pahnih tottoo-a rang ruai tawh belhchhah turin tattoo dang a chhutbelh leh dawn tih a sawi!
Kum 24 mi Vondrousova hian final khelh hma khan a coach Jan Hernych nen inchawiin, a champion chuan ani pawhin a taksaah tattoo a chhukai ang a, amah pawhin a chhutbelh dawn tih a sawi a, London-a hun ropui a tawnbuak lawmna leh hriatrengna atan tattoo dang a chhutbelh dawn tih a nemnghet.
Unseeded player zinga Wimbledon women’s title hawn thei hmasaber hian Centre Court grass-ah nikum final-a chak lo tawh Arab nula a hmachhawn a, rinkai lo zawk ni chungin Tunisian tahna thlentu a ni ve leh ta a; hnehna a chan hnuah court chhunga amah kawmtu chuan engtia a champion chu lawm tum nge a nih tih zawtin, Vondrousova chuan nui chungin, “Beer ka khulh hmel. Chawlhkar hnih chhung chu ka tui a hal ta a,” a ti!
Sawizawmin, “Ka hre lo le, mahse, ka coach nen kan in bet a, grand slam title ka lak chuan tattoo a chhut ve tur thu sawiin, naktuk hian a chhut hna kan tan mai thei,” tiin tattoo chungchang a tarlang tel.
Champion thar Marketa Vondrousova chuan a taksaah engzat chiah nge tattoo a nei tih a hre lo a, mahse, tattoo dang chhutna tur hmunawl erawh a la tam tih a sawi!
World ranking thara top 10 luah chho tur leh a coach hian tattoo parlour an pan dawn tih chu a chiang tawh a, vawiin lam hian London-ah an chhuttir nghal dawn em tih erawh sawilan a awm lo a, Vondrousova leh Hernych hian an tattoo thar tur an la thlang fel lo.
Nui chungin Vondrousova chuan, “A tattoo chhut tur hi ka thlansak mai thei a, a inang kan chhukai pawh a ni thei,” a ti.
Czech player hian a ban leh ke lama tattoo a chhutte chu ‘art’ tiin a sawi a; a bana a tattoo pakhatah chuan ‘No rain, no flowers’ tih a chuang a, a dangah chuan ‘It’s OK’ tihte awmin, a tattoo dangte chu heart, tulip (pangpar) leh number 13-te a ni.
World number 42 Vondrousova inkhel en tur hian a pasal Stepan Simek pawhin Prague khawpui atangin London khua a thlawklut a, All England Club-a a nupui huntawn ropui a thlirpui.
Veikhawr Vondrousova hian record thar dang siam bawkin, kum 2019 khan non-seed ni chungin French Open final-ah Ash Barty a hneh lo tawh a, hmeichhiate zinga unseeded player ni chunga grand slam final vawihnih khel thei hmasaber a ni.
Paris clay-court grand slam-a hming a rawn chher hluai hnu khan Czech player hian tluk leh din a fawm chho ta tlat a, kumin Wimbledon hma zawnga a career-a title a lak awmchhun pawh kum 2017 daih tawh kha niin, kum 2021-ah ram tan Tokyo Olympics-ah inlanin silver medal a awrh a; kumin tihloha Wimbledon-a vawili a inlanah match khat chauh chakin, nikum phei kha chuan a banrek zai avangin London tournament lian kha khualzin satliah angin a chhim ve chauh!
Kum 2023 a ni a, All England Club-a final a luhna kawngah seeded player pali tehreng a hnawtchhuak tling a, final match-ah rinkai zawk sixth seed Jabeur barakhaih lehin, professional era-ah Czech player zinga Wimbledon singles title hawn thei palina a ni a, Martina Navra-tilova, Jana Novotna leh Petra Kvitova-te hnung a zui ve thei chiah.
Wimbledon hmeichhe singles title la zawn thei an chhuak mawh ta hle a, Von-drousova hi he trophy changtu mithar pa-rukna niin, a zawna champion thar paruk kan hmuhna chiah a ni.
Nikum final-ah Elena Rybakina hneh loin a tlawm a, 2022 US Open final-ah Iga Swiatek a ngam lo leh a, Jabeur tan major final-a chak duhna a sang hle tura ngaih a nih laiin Arab player zinga grand slam title la thei hmasaber nih a tumna leh African hmeichhiate zinga major trophy pali zinga pakhat tal sualchhuak hmasaber nih a tumna a puitlin zo leh ta lo a, mittui nen Centre Court a chhuahsan leh rih a ngai.