Champion lawmna’na Verstappen chak

Champion lawmna’na Verstappen chak
Thla hmasa mai khan Las Vgas intlansiakah a mamawh tawk point thawkchhuak chungin Max Verstappen chuan a title kawl lai humhimin a career-a a vawilina atan Formula One world title a hlawhchhuak hlimhlawt a, tun Pathianni khan season kal laia race hnuhnungber dawtt u Qatar Grand Prix-ah hnehnain a champion a lawm!
Red Bull driver chhuanvawr Verstappen hian race laihawla tum hnih ngawt safety car tlanlut leh McLaren driver Lando Norris-a penalty chawi a hlawkpui a, yellow flag vai laia a tlan muan loh avangin Briton hi 10-second stop-and-go penalty pek a ni a, inbeihna chep takah Dutch driver-in hnehna a chang hram a ni.
Norris hi 10-naah thlengin, pahnihna chu Scuderia Ferrari driver Charles Leclerc a ni a; pathumna nia lawmman semna dawhsan hniam ber luahtu chu McLaren driver pakhat zawk Oscar Piastri a ni.
Verstappen kha Norris-a penalty hmuhna kawnga a meizang hlaptu niin, Pathianni race-ah khan Mercedes driver Lewis Hamilton leh Ferrari khalhtu Carlos Sainz-te pawh ‘puncture’ avangin an buai ve ve a, intlansiak vil dan (race management) chungchangah motorsports thuneitu sangber FIA lamin Qatar Grand Prix huaihawttute chhan tur zawhna an nei dawn!
Arab thlalera ‘puncture’ thlentu kha tyre pawp leh thler vang nge wing mirror kehin a thlen tih hriat theih a ni rih lo a; tlankawnga carbon-fibre leh glass keh them hmuh tur awm chuan Valtteri Bottas-a Sauber car pawh a tibuai a; a hnuah safety car tlanlutin, tlankawng enkawltu marshal-te’n an thianfai ta a ni.
Intlansiak an chhunzawm leh a, Norris chuan season tluana a elpui lian leh a tawpa a hneh leh tak loh Verstappen lak atangin chona a hmachhawn leh a, penalty avangin British driver Norris-a podium beiseina a thamral zui leh ta a ni.
Kha hremna khan constructors’ championship-a McLaren san belh tur pawh a dang tel bawk.
Kartawp hian Abu Dhabi lamah season kharna final race an tlan dawn a; tun dinhmunah constructors’ championship-a hmahruaitu ni mek McLaren hian point 21 lekin an hnung chiaha umtu Ferrari an kalsan tawh a, vawikhat tlan tur la awmah hian point 44 lai ruh tur a la awm bawk si avangin Qatar Grand Prix-a an driver penalty hmuh khan British team hi dinhmun him lo takah an dintir mek a ni.
Pathianni intlansiakah insubuai hmuh tur a awm nual a, chu’ng zingah chuan lap khatna leka Nico Hulkenberg, Esteban Ocon leh Franco Colapinto-te intawksir kha a tel nghe nghe.
December ni 8, kartawp Pathianni khian Yas Marina Circuit-ah F1 2024 Abu Dhabi Grand Prix hmangin season hmawr an bawk fel tawh dawn a ni.