Champions Trophy khelhna Pakistan-ah inralrinna tichhuak

Champions Trophy khelhna Pakistan-ah inralrinna tichhuak
Pakistan-a Intelligence Bureau (IB) chuan ICC Champions Trophy 2025 an thlen mekah pawl pakhat, rinhlelhawm tak an hai chhuah avangin inralrinna an tichhuak a, heng mite hi ram dang mikhual ruk bo tum an ni thei tih an sawi.
Champions Trophy-ah hian India tih loh ram dangte chu Pakistan-ah vek an inkhel a, India hian final an lut a nih chuan an khel ve chauh vang.
CNN-News18 chuan inralrinna hi firfiak pawl eng emaw zat, Tehrik-e Taliban Pakistan (TTP), ISIS leh Balochistan-a inkulh pawl lakah fimkhur tura tihna a nih thu puangin mi ruk bo an tum vang niin a tar lang a. Venhim hna thawktuite pawh an inring zual niin an tar lang bawk.
Pakistan hi mi firfiak tamna a nih avang leh tharum thawhna a thlen fo avangin khawvel huap infiamna intawhkhawm lian thlen hlauhthawnpui an ni sa a. Kum 2009-a Sri Lanka cricket team beih an nih hnuah hlauhthawn a nasa zual.
Champions Trophy an thlen mekah hian tual chhung chanchinbute chuan Lahore leh Rawalpindi-a inkhel a awm chhung chuan police officer 12,000 duty-tir an ni thin niin an tar lang a. Duty zingah hian senior officer 18, DSP 54, inspector 135, upper subordinate 1,200, constable 10,556 leh hmeichhe police officer 200 an tel thin.
Venhimna pek that bakah hian Pakistan Cricket Board (PCB) chuan an ram thlawhna, Pakistan International Airlines (PIA) chu inkhel en tum leh team tan special charter flight buatsaih turin a ti a. Heng thlawhna hi Karachi, Islamabad leh Lahore inkarah thlawkin players leh mikhual langsar tan pawh a tangkai hle nia sawi a ni.