Championship title chuh turin Russell inpeih

Championship title
chuh turin Russell inpeih
Season kal laia a vawi hnihna atan Pathianni Singapore Grand Prix-ah Mercedes diver George Russell a rawn chak leh nawlh a, champagne bur sawh hawnga champion a lawm hnuah driver standing-a a hmaa ding pathumte ruala championship title chuh tak tak turin a inpeih tih a sawi.
Tarlan tak angin, Briton Russell hian drivers’ championship-ah palina luahin, a chung chiaha pathumna Max Verstappen lakah point 36-in a hniam mek a; hmahruaitu Oscar Piastri lakah point 99-in a hniam thung.
Kumin June thla Canada ram intlansiaka lo chak ve tawh Russell hian Singapore tlankawnga hnehna nuamsa a chan hnuah title race-a ralban mai a tum loh thu sawichhuakin, “Kum hniuh thum liamtate ngaihtuah chuan vawiin hian driver dang daih ka ni tawh a, ka inringtawkin, ka famkim zual tawh zawkin ka hria a, a hun mil zela chet lak dan tur pawh hre tawhah ka inngai.
“Pathianni race tan hma khan min rin lawk ang ngeiin ka nervous chiang a, mahse, min tibuai tam khawp chu a ni lo a, chak turin chance ka nei tih ka hria a, nuam ti takin car ka khalh thei.
“Ka lo sawi zauh tawh angin, championship-a beisei nei ve tak tak ngam turin ka inpeih ta niin ka hria a, ka hmabak leh chiah atan pawh ka inpeihchhuakin ka hria,” a ti.
Russell hian kumina a hmasawnna chu tawnhriat vang nia sawiin, a hun mil zela insiamrem dan thuruk a man chhuak ta chuan a pui tha hle nia sawiin, “Kum hnih vel kalta kha chuan tang teuh leh helhkham nei ul chungin car ka khalh a, tul uk loah ka inhambuai deuh vak thin.
“Tunah erawh hahdam zaihin intihsiak ka hmachhawn thei tawh a, vawiin pawh hian cool raihin bul ka tan thei.
“Intlansiak hma darkar khat la awma ruah a han surte khan min tibuai lo a, keimah chauh lo pawh a nan ve tho tiin ka ngaihtuah a, tih theih ka nei lo a, lo buai chiam na tur chhan ka nei lo tihah ka chiang a, ka hahdam thlap a; kum hmasa lamte kha chu ka ni se la uite vawihkhum ang main ka phi leh cheng awm sia,” a ti!
Russel hian kawng hrang hranga a lo puitling chho ta chu title race-a beisei a neih ve ngam tak chhanah a ngai a, kan la hria ang chu!
British driver Russell-a contract neih lai hi tun season zawh ruala tawp ve tawh tur a nih laiin kum kal mekah vawi hnih ngawt a chak tawh a, hei vang hian Mercedes lamin inremna thar an ziahpui a rinawm.
Kumtir lam khan team principal Toto Wolff chuan Verstappen lam a awn deuh tui avangin Mercedes-a Russell-a hmalam hun a chiang lo a, kum tharah hian Mercedes driver seat a chan tawh loh mai rinna a lian hman a, mahse, team principal hlui Christian Horner an ban dawn boruakah khan Dutchman Verstappen chuan Red Bull-a cham zui zel a inpeih thu a sawichhuak a, championship lamah Russell a chechhe lo bawk nen British team-a contract thar a ziah a rinawm chho ta viau a ni.
Singapore-a a chak thleng khan Russell leh Wolff hian contract thar ziak turin inremna la tifel lo mah se chawlhkar reilote hnua thuthar an neih a rinawm a, media-te rin dan chuan tun October 17-19 chhunga tlan tur United States Grand Prix hma ngei hian inremna thar an peih fel hman dawn niin a lang!
Pathianni Singapore Grand Prix-ah khan Red Bull driver ropui Max Verstappen chu pahnihnaah thlengin, McLaren driver Lando Norris chuan lawmman semna dawhsan hniam ber a luah a; a team-mate leh championship hmahruaitu ni bawk Oscar Piastri chuan podium lawn pha lo tawk chiahin palina dinhmun a lungawipui mai a ngai!
Singapore Grand Prix an tlan lai khan boruak a lum hle a, a hnawng uap churh bawk a, temperatures kha 30C niin, humidity pawh 72% zet a kai chho.