Football billionaire player hmasaber Cristiano Ronaldo

Football billionaire player hmasaber Cristiano Ronaldo
Financial information and media firm Bloomberg chhut dan leh tarchhuah danin Portugal tana game 223 khela international player zinga ram tana khel hnem ber ni mek Cristiano Ronaldo chu footballer zinga billionaire hmasaber a ni.
Saudi Arabian club Al-Nassr tana khel mek Ronaldo hi Bloomberg Billionaires Index chhut danin khawvela footballer hausaber a ni a, a career-a a thawhchhuah tawh an chhutsak a, a hlawh bakah sumdawnna (investments leh endorsements) atanga a sum huiluh tawh chu USZ dollar tluklehdingawn 1.4 (£1.04bn) niin an tarlang!
Bloomberg chhut zel danin, kum 40 mi ni tawh chunga Portugal leh Al-Nassr striker rinawl ber la ni thei khawpa mi invawng leh kal tluang Ronaldo hian kum 2002 atanga 2023 chhung khan a inkhelh hlawh atangin US dollar maktaduai 550 (£410m) chuang a huilut a; club atanga a hlawh hmuh bakah hian inremna dang neuh neuh leh sponsorship atanga a sum hmuh a hraw hle a, hun rei tak a thawhpui tawh Nike nena an inremna angin kum khatah US dollar maktaduai 18 (£13.4m) dawn a lalut tling bawk.
Kum 2022-a Saudi Pro League club Al-Nassr a zawm hlim khan media lam chuan kum khata pound maktaduai 177 tehreng hlawh tur angin an tarlang a, player leh club lamin official-in tarlang chiah lo mah se Ronaldo hlawh kha a tlem dawn lo tih a chiang a, football history-a player hlawh hnember ni chho nghala ngaih ngheh nghal hmiah a ni!
A contract hmasa kha kumin June thlaa tawp tur a nih lain kum hnih dang atan inremna thar a ziak fel leh diam tawh a, contract tharah phei chuan a kum 42-na birthday a lawm zawh thlenga Arab team tana a khelh manah US dollar maktaduai 400 (£298m) tehreng a hlawh tling leh hep dawn!
Cristiano Ronaldo hming lam rik ruala lam tel ve loh remchang lo zet Argentina leh Inter Miami forward Lionel Messi sum huiluh zat pawh Bloomberg hian an chhutchhuak ve dap a; a career pumpuiah chhiah a chawi hmaa a sum huiluh chu US dollar maktaduai 600 (£447m) chuang niin an tarlang.
He sum hlawmah hian kum 2023 atanga a kum tin kum khat zel hlawh chiangsa US dollar maktaduai 20 (£15m) zel kha chhut tel niin, chu chu hun inanga Ronaldo income atanga chhutin 10% vel a ni a, Spain rama kum tam khelmual chhung leh pawn lam thlenga lo inpawt ngar ngar tawh Ronaldo leh Messi hlawh hi inthlau viau a, Arab sum bawm zen leh zen lo chu an hriathran deuh!
Inkhelh a chawlhsan hunah kum 38-a upa ni mek Messi hian Inter Miami-ah chanpual a nei nghal dawn a, club neitu pakhat a ni chho ang.