Chapchar Kut hman hun sawn hnung

Chapchar Kut hman hun sawn hnung
Chapchar Kut 2026 Organising Committee chu an chairman, chief minister Lalduhoma hoin Thawhlehni khan an thukhawm a. Kum 2026 Chapchar Kut hman dan tur an rel. Art & Culture minister C Lalsawivunga leh member dangte an tel.
Kumin Chapchar Kut hman dan thlirlet a ni a. KUm 2026-ah hian hapta khat awh leh tura duan niin, hmun hran hrana programme buatsaih a, a ni pui ber ni khat chauh Lammuala hman tura tih a ni. A hun thuah KTP Inkhawmpui lian nen a inrual thin avangin kum tharah chuan March hapta hnihnaa hman ni tawh se an ti a. A lawmna pui ber March 13-ah Aizawl Lammuala hman tur a ni.
Kutpa atan chief minister Lalduhoma ruat a ni a. A lawmna pui ber neihna hmun Lammual buatsaih dan tur, official pavilion leh stage siam dan tur an rel. Programme kimchang duangtu tur Programme Committee, Sponsorship Committee leh Post Souvenir Editorial Board din a ni a, budget an siam a, thupui atan “Zo nun zemawi – Inremna” tih thlan a ni.
Kum hmasa lam ang bawkin hnam pual cultural troupe bakah NEZCC leh ICCR Cultural Troupe chu 2026 Chapchar Kutah sawm leh an ni dawn a. Chapchar Kuta sem thin Chief Minister’s Award kalpui dan tur duan mek a ni bawk.