Chechnya-ah music rang lutuk leh muang lutuk an khap!

Chechnya chuan an ram chhunga rimawi reng reng chu minute khata tempo 80 atanga 116 beat a ni tur a ni, an ti mauh mai. Hetiang a nih chuan khawthlang lam rimawi leh techno music tih vel chu an ram chhungah a play theih dawn hauh loh. He Russian republic hian an ramah rimawi beat muang lutuk emaw rang lutuk emaw an khap hmiah mai a ni.
Moscow Times-in a tarlan danin he khapna thu hi culture ministry chuan tunkar tir khan an puang a, tuna an rimawi beat phal chin hi tunlai pop music nawlpui aiin a muang hle a, music genre thenkhat chu a play theih dawn loh tihna a ni.
An hruaitu Ramzan Kadyrov chuan culture minister Musa Dadayev hnenah Chechen music chu Chechen mentality nena inmil tir turin a hriattir a ni awm e. Dadayev chuan, “Midang hnen atanga musical culture hawh sak hi enliam mai mai theih a ni lo,” a ti.
He khapna thu hi sorkar lam thuneitute leh an rama artist-te an inbiak rawn hnuah puan a ni a, mahsem artist-te chu June ni 1 thleng hun pek an ni a, hetih chhung hian an music te chu sorkar duh dan anga her vek tura hriattir an ni a, an hla leh rimawi neih sa te pawh an siamtha vek a nih loh chuan tihchhuah an phal tawh dawn lo a ni.