London club lian Chelsea chuan British player man to ber ni tura an lak luh Enzo Fernandez chu nilaini khan mipui hmuh turin an pho lang. World Cup 2022 a rawlthar tha bera Fernandes hian Chelsea ah Jersey No 5 a ha dawn. Blues in £107m zet senga an lak luh Fernandes hian Jack Grealish record khumin, British player man to ber record thar a siam a. Tun tumah hian British a player man to chhoh dan kan thlir kual thuak thuak ang.
-- Advertisement --
Kum 1928 daih tawh khan Arsenal chuan an player hlui David Jack chu Bolton Wanderers atangin an lei a. David Jack manah hian £10,000 zet an seng. Arsenal in David Jack an leina hi a hun laia Bristish transfer record a ni a, player mana £10,000 an sen tlin hmasak ber tum a ni.
Hun a kal hret hret a, football club an hausa telh telh a, player man pawh a to ve zel. British club zingah player pakhat lei nana nuai seng tling hmasa ber chu Manchester United an ni a. Unites hian kum Kum 1962 khan Denis Law chu Torino atangin an la lut a, Senis Law manah hian £115,000 an seng. United in Denis Law an lak luh hma lawk hian Tottenham chuan £99,999 sengin AC Milan player Jimmy Greaves an la lut a. Tottenham in Greaves an lak luhna hi thla riat hnuah United hian an khum. Manchester United hi player pakhat lei nana maktaduai seng tling hmasa ber an ni bawk a. Manchester United hian kum 1981 khan West Bromwich Albion atangin Bryan Robson chu £1.5m sengin an la lut.
Hun a kal leh deuh a, player ropui Alan Shearer a rawn lang ta nawlh. English Premier League-a goal thun hnem ber ni mek Alan Shearer hian kum 1996 khan Blackburn Rovers atangin Newcastle United a zawm. Newcastle hian Shearer manah hian £15m sen an seng. Magpies in Shearer an lak luhna zat hi a hun lai khan British player man to ber a ni mai lova, khawvela player man to ber ni bawkin Diego Maradona record a khum hial nghe nghe a ni.
Premier League a lar zual zel a, EPL a sum leng vak pawh a tam sawt viau bawk. British player manto ber record khumin a awm chho zak zak. Ruud van Nistelrooy, Juan Sebastian Veron leh Rio Ferdinand te record hmuh tur a awm hnuin Chelsea chuan kum 2011 khan Fernando Torres chu Liverpool atangin an lei a, Torres manah hian £50m zet sengin, British player man to fel a ni zui nghal. Chelsea in Torres an lak luh hnu hian United in British tranfer record an siam chho zawn leh. Kum 2014 a Angel di Maria an lak luhna £59.7m kha British transfer record a ni a. United vekin kum 2016 ah £89m zet senga Paul Pogba an lak luhna kha British trasfer record thar a ni leh bawk.
Club hlun leh hausa United in British transfer record an siam chho malh malh hnuin club hausa thar Manchester City an rawn lang a. City hian kum 2021 khan Jack Grealish chu Aston Villa atangin an la lut a. England forward Grealish manah hian £100m zet an seng. Grealish hi kum hnih chhung British player manto ber a ni hman a. Chelsea in Benfica atanga an lak luh Enzo Fernandes (£107m) chu January 31, 2023 atang khan British player manto ber a ni ve leh ta thung.
Heng kan tarlan hrang hrang bakah hian Abramovich, Andriy Shevchenko, Robinho, Andy Carroll leh Luis Suarez te hi British player manto ber lo ni tawh zinga langsar zual zingah an tel ve bawk.