Chenna hnaiha vawk vulh remti lo tep Zana bawlhhlawh khawnna nei dawn

Aizawl Municipal huamchhunga mihring chenna hnaih lutuka vawk vulh chu remtih loh thuai a ni dawn a. Traffic jam tih ziaawmna atan hmun lun lai bikah zan lama bawlhhlawh khawn tum a ni bawk.Aizawl Municipal Corporation Board of Councillors’ (BoC) chu mayor Lalrinenga Sailo kaihhruaiin Nilaini khan an thukhawm a. Traffic jam tih ziaawmna tur leh mipui tana awlsam zawk turin Aizawla hmun remchang leh lun bikah te zan lamah bawlhhlawh khawn ni tawh se, tiin thutlukna a siam a. Heng bakah hi chuan zing kara bawlhhlawh khawn kalpui mek hi a tul angin kalpui zel a ni ang.
AMC chuan bawlhhlawh phur lirthei tinah helper dah ngei ngei turin a rel bawk a; dan zawm lo leh helper tel loa bawlhhlawh khawnte chu na taka hrem nise, tia rel a ni.
AMC chuan Aizawl khawpui chhunga mihring chenna hnaih lutuka vawk vulhte titawp tura chak taka hma lak a remti a. Mihring chenna atanga feet 100 aia hnaiah vawk vulh khap nise, tuna vawk vulh mekte ngaichangin 2024 January 15 atanga kenkawh tan nise, tiin a rel a ni.
Aizawl khawpui kawtthlera electric ban leh remchang danga TV cable, internet cable leh hrui dang zam hnawk chinfelna’n khuahkhirhna dan (regulation) siam turin thutlukna siam a ni bawk.
BoC meeting-ah hian executive councillor (Cash & Accounts) Lalringliana chuan AMC Financial Statement 2022- 2023 a pharh a, sawi ho zui a ni a. Corporator-te putluh motion pawimawhte sawi ho a ni bawk.