Zoramah Remna Ni hmang

June 30 khan Remna Ni 2023 chu district tina hman a ni a. Aizawla hmanpuitu chief minister Zoramthanga chuan Mizoramin remna a neih champha a lo thlen hian, kan remna hi midangin a zar an lo zo ve theihna’n hma lak tum theuh turin mipui a sawm tih a sawi.Chief minister hian rambuai a chhuah chhan a sawi a. Mizoram chu tunhmaa undivided India awptu British-in India an chhuahsan dawna ram danpui an siam khan Mizoram hi a huam tel ve lo (excluded area) a ni a. Political party pawh nei ngailo khan 1946-ah party din awih a ni a, 1947 ah India a independent dawn tak si ah khan, chutia politics-a kum khat chauha upa chuan mipui an kumkhaw awm dan tur thutlukna an siam a ngai ta thut a, chu thutlukna chu mi fing ber tan pawh siam thiam harsa tak a ni, tiin a sawi.
“Ngaihdan chi hrang panga – Burma zawm emaw Pakistan zawm emaw India-a tel emaw British-in la awpin Crown colony a awm emaw independent-a awmte a a awm a. Chutah British an kian taka Mizoram rorelna ruak ta (political vacuum) karah India sawrkar chu rawn zuanglutin, keini chuan a nih dan turah ngaiin kan lo pawm mai bawk a; chu chiah chu kan rambuai thu bul chu a ni,” Zoramthanga hian a ti.
India ramin mipui duhthlannaa ram a indinna ram danpui bu an ziah lai khan Mizoram emaw Mizo mipui hriatpui leh tel ve miah lohna a ni tih sawiin, chumi chungchang chu central lam hotu Mizorama lokal thenkhatte bulah lo sawipuiin, an ni pawhin ngaihtuah zui tham nia an hriat thu an sawi a. Chutiang karah chuan lehlamah inrinhlelhtawnna a lo awm a, chumi kalzelah chuan buaina a lo awm chho ta tih a sawi a ni.
Mizoram chu ram buaia puan a nih hnu ah remna leh muanna a awm theihna’n kawng hrang hrangin mi hrang hrangin theihtawp an chhuah tih chief minister hian a sawi a. Tan ina khung hial tawk khawpa kohhran lamin hma an lak dan te, tlawmngai pawl leh political party leh mipui inpekna thuk takte chu fakawm a tih thu a sawi.
“Mizoram remna hi thil chi hrang hrang lian leh te zawmkhawm hmanga siam, tawrhna kara chunglamin thilpek ropui Mizo mipui a pek a ni. Hun kal zela he remna hi remna tluantling a nih zia a chiang zel a, India state dangah pawh remna hi lo ziah fo tawh a nih laiin, a tluantling thei tak tak lo thin. Mizoram chawilarna’n kan kan thil neih hrang hrang zingah midangin an neih ve loh chu, kan remna leh muanna hi a ni a. Hei hi hmang tangkaiin, kan thenawm ram leh state-a buaina awm karah remna palai kan nih thei a ni,” Zoramthanga hian a ti.
Inkhawm kaihruaitu chief secretary Dr Renu Sharma chuan remna thuthlung ziah vawiin thlenga chhawmnun a la nih chhan zingah mipui inpumkhatna leh mihring dikna chanvo ngaihpawimawh vang nia a hriat thu a sawi.
Mizoram Kohhran Hruaitute Committee member Rev. Lianhmingthanga Sailo chuan Mizoram rambuaia puan a nih hnua remna a awm theihna tura kohhranin hma a lakna hrang hrang a sawi a. Mizorama kohhran tanghoa committee dina hma lak dante, inbiakna neih dan, ram hruaitute hnena thu thlente sawiin, remna neih theihna’na ramhnuaia sipai awmte, tlawmngai pawl leh mipui, khatihlaia sawrkar hotute, an vaiin an hmalakna leh remna atan chan neih pawi tiloa an inpekna chu ropui a tih thu a sawi a ni.
NGO Coordination Committee chairman R Lalngheta chuan rambuai lai hre pha tan chuan remna hlut zia a chiang tih a sawi a. Thangtharten khatih hunlaia nun ralmuanglo leh ti taka awm hunlai kha tawngin hre ve lo mah se, remna leh muanna chhawmnung zel turin a sawm a ni.
Remna Ni pualin June thla chhung khan sawrkar ruahmanna in thisen pek runpui, khawtkang tihfai hnatlang, thingphun runpui leh thildang buatsaih a ni a. Thalai leh zirlaite tan intihsiakna, sawrkar department hrang hrang kaltlanga buatsaih a ni bawk.