India chuan kum 1881 atang khan kum 10 dan zelah chhiarpui (Census) a nei ziah a. Mahse, kum 2020 khan kum sawm dana chhiarpui neih thin chu pandemic vangin neih theih a ni lo.
Sorkar chuan chhiarpui neih hun tur hi a la puang lo chungin nei tura hmalakna leh ruahmanna kalpui mek a ni a. Chhiarpui neih tur hi digital Census hmasa ber tur ni bawkin khua leh tui te chuan ‘self-enumerate’ mahnia tih theihna remchang an nei thei dawn a ni.
NPR (National Population Register) chu khua leh tui tute pawh sorkar ruat chhiarpui neitu (enumerator) te aia census form tikhat duhte tan remchanna a siamsak a. He mi atan hian Office of the Registrar General of India (RGI) chuan ‘self-enumeration’ portal siamin tunah chuan English chauha siam niin tlangzarh mai tur a ni bawk a. Self-enumeration neihnaah hain Aadhaar emaw mobile number te chu tihmakmawh a ni ang.
-- Advertisement --
Census exercise dinhmun?
January 2 khan sorkar chuan notification siamin June 30 thlengin chhiarpui neih nan administrative boundary te freeze tura tih chuan September thla hma chuan chhiarpui neih theih a ni lovang a ti a. Hei vang hian chhiarpui chu kumthar lamah neih theih a nih chauh hmel a. Sorkar hnathawk 30 lakh vel te chu enumerator-a hman ni dawnin pakhat zelin mi 650-800 vel te chu online emaw offline mode-in emaw an chan a ngai ang a, mipui vaibelchhia 135 vel te an tuam dawn a ni. Lok Sabha inthlan chu April-May 2024 ah neih tur a nih dawn avangin Census chu he mi hma hi chuan neih theih a nih hmel loh bawk. Census neih nan hian a tlem berah thla 11 tal ngai tura ngaih a ni bawk.
Census tihkhawtlai chhan?
Pakhatnaah chuan Registration of Births and Deaths Act, 1969 amendment tihkhawtlai vang a ni a. Sorkar chuan population register, electoral register, Aadhaar, ration card, passport leh driving licence databases atan births and deaths registration chu hman a duh a ni. Heng data-te hi mihringte inrawlh ngai lova siam tum niin miin kum 18 a tlinin electoral roll-ah a dah nghal ang a, a thih pawhin a paih nghal tura siam a ni a. He dan thar hi Parliament session neih leh hmasak berah Home Minister Amit Shah chuan a pharh dawn a ni.
Self-enumeration leh NPR?
May 22 khan Amit Shah chuan new Delhi-ah Janganana Bhavan (Census building) a hawng a. Chutah chuan report “the treaties on Indian Census Since 1981” tun hnaia Census leh a kaihhnawih neih tur thila zawhna awm thei chhanna pawh awmna chu a tlangzarh bawk a. Report chuan ‘Census a self-enumaration chu NPR [National Population Register] online update te ah chauh kalpui tur a ni ang’ a ti.
NPR hi Census ang lo takin India rama cheng tin te ‘identity database’ a ni thung a, heng data te hi State leh sorkar department tena an hman tawn theih a ni. Census chuan NPR ang bawkin information a lakhawm tho chungin Census Act of 1948 chuan mimal data-te chu State emaw Centre-a share a remti lo thin a, administrative level chauha hman remtih a ni.
Citizenship Act, 1955 hnuaia Citizenship Rules 2003 chu National Register of Indian Citizens (NRIC/NRC) atana sulsutu niin Assam chu Supreme Court thupek anga NRC kalpui zo fel hmasa ber a ni a. Assam NRC-ah khan diltu 3.29 crore atangin 19 lakh lai chu a hnawl a ni. Mahse, hei hi sorkar lai mek BJP te chuan hnawlin re-verification an ngiat mek a ni.
Kum 2020 khan NPR chu state hrang hrang West Bengal, Kerala, Rajasthan, Odisha, Bihar, Andhra Pradesh, Telangana, Punjab leh Chhattisgarh bakah civil society organisations te chuan dodalin NRC hmangin mi tam tak ram nei lovin a siam dawn an ti a.
Hei bakah hian Citizenship Amendment Act (CAA), 2019 December 31, 2014 hmaa Pakistan, Afghanistan leh Bangladesh atanga sakhua paruk zuitute tihduhdah tuara India lutte khua leh tui nihna pek theihah Muslim te huamtir lo an ni bawk a. Mahse, sorkar chuan CAA leh NRC te chu inzawmna nei lo tiin ram pum huapin NRC kalpui tumna a awm lo a ti thung.
Tuna NPR dinhmun?
NPR hi kum 2010 khan Centre a Congress sorkar laia kalpui hmasak ber a ni a. Kum 2015 khan update niin khatah khan 118 crore te chanchin kimchang a nei der tawh.
March 2020, Ministry of Home Affairs (MHA) khan Census Rules chu siamthain Census data-te chu electronic form leh self-enumeration tih theih tura siam that a ni tawh a. NPR hi update mai theih tur a ni mek bawk.
NPR-ah hian family member kaihhnawihah zawhna 21 awmin kum 2010 l3h 2015 ah kha chuan zawhna 14 chauh a awm thung a. Sub-head siam zingah passport number, head of the family nena inlaichinna te, kawppui then nih leh nih loh te, pianpui tawng, Hna chelh/thawh hrang hrang te pawh a tel a. Hei bakah hian Aadhar, mobile phone, Voter ID leh driver’s licence te dahkhahna tur a awm bawk.
Sum sen tur?
Shah-a’n report a tihchhuahah Registar General of India-in Ministry pawimawh zual leh PMO a circular a pekah Cnesus 2021 kalpui nan Rs 9.275 crore seng turin a hisap a, mahse, NPR a tel lo. Chumi hnuah draft Expenditure Finance Committee (EFC) chu revised niin NPR update belh niin chuta sum sen tur chu Rs 4,442.15 crore-in a dah a. He rawtna hi August 16, 2021 khan pawm tawh niin Union Cabinet chuan December 24, 2019 khana pawmpui tawh bawk a. Census enumerator te chu NPR data collect tel tura tih an ni. Mahse, March 2020 ah pandemic leng avangin kalpui theih a ni ta lo va. Tunah erawh mahnia Census form hnawhkhat duh tan NPR chu tihmakmawha siam a ni zui ta bawk.
Khua leh tuite tan Census hi tihmakmawh a ni a, chumai ni lovin Census-a thudik lo hrilh emaw sawi leh tih chu na taka hremna lekkawh theihna a ni bawk.