Chhiarpui leh Mizoram

On Apr 2, 2026 3 0

India ram chhiarpui 2027 chu nimin April ni 1 atang khan neih tan a ni ta a. India ram chhiarpui hi khawvela ‘chhiarpui lian ber’ tih a ni a; India-in digital hmanga census a neih hmasak ber a ni bawk.
Mizoramah pawh Chhiarpui 2027 hi nimin zing dar 6:30 atang khan chief minister Pu Lalduhoma chenna in atangin bul tan a ni a; nakum 2027 March thlaah zawhfel tur a ni a, mobile phone hmanga mahnia inziaklut (self-enumeration) tur te tan official portal (se.census.gov.in) ah inziahluh theih a ni.
Kan hriat angin, India ram chhiarpui hi kum 10 dana neih thin a nih laiin, khawvel huap hrileng (COVID-19) avangin chhiarpui neih hun tur 2021-ah neih theih a ni lo va; kum 15 hnuah neih a ni ta chauh a, chhiarpui hunbi a danglam chho dawn ta a nih hmel.
Mizoram chhiarpui neih tawh dan (census history) han thlir hian, kum 10 dana mihring pun dan (decadal growth) hi a su (fluctuate) nasa thin hle a. Chhiarpui hmasa ber 1901-ah mihring 82,434 kan awm a. Kum 1911-ah 91,204; kum 10 chhunga a punna hi 10.64% a ni. Kum 1921-ah 98,406 awmin a punna hi 7.9% a ni a. 1931-ah chuan mihring 1,23,304 awmin a punna hi 26.42% a ni ta dawrh a. Heta tang hian chhiarpui apianga decadal growth percentage hi 20 chunglam a ni chho ngar ngar tawh a, kum 1981-ah phei chuan 48.55% a ni dawrh a, hei hi chhiarpui awm tawh chinah decadal growth rate san ber tum a ni. Heta tang hian chhiarpui apiangin kan tlahniam leh ta thung a (1991—39.70%; 2001—28.82%; 2011—23.48%).
Chhiarpui hnuhnung ber 2011-ah mihhring 10,97,206 kan awm a, a hma aia a punna hi 23.48% a ni. Kum 2021 khan chhiarpui neih lo ni ta se, decadal growth percentage hi tlahniam tawh lovin a hmaa mihring punna rate (23.48%) anga chhutin, mihring pun belhna hi 2,57,624 a ni ang a, 2021-ah chuan mihring 13,54,830 (10,97,206+2,57,624) kan awm tawh dawn tihna a ni.
Hei hi ngaihruatna (hypothetical) mai mah ni se, a hniam lam emaw, a sang lam emaw-ah a sual tam vakin a rinawm loh a. Tuna 2027 chhiarpuiah hian mihring nuai 14 chu kan chuang ve tawhin a rinawm.
Mizoram chhiarpui atanga lo lang ta chu, 1981 atang khan mihring pun dan a tlahniam zawngin a la kal ngar ngar, tih hi a ni. Tunhma aiin mihring kan piang pung chak ta lo zawk a, chutih rualin kan thi tam tual tual zawk bawk si niin a la lang zui lehnghal a, hei hi kan ngaihtuah ngun a pawimawh ta khawp mai le.