National Disaster Management Authority (NDMA) leh Mizoram State Disaster Management Authority (SDMA) tangdun chuan nimin khan state pum huapin lirnghin thlen thulha chet lak dan tur a tak ang thei bera lantirna a buatsaih a. Aizawlah chuan hriat tur tul inhrilhhriatna neih zui a ni.
-- Advertisement --
Disaster lama NDMA atanga mithiam lokal Brig. BS Thakar chuan department hrang hrang atanga telte hnenah lirnghing avanga chhiatna thlen thulha hmalak dan tur zirtirin, DDMA/DC ten virtual conference kaltlangin mock exercise hi an lo zawm a ni. He hun hmanpui tur hian NDMA member Lt Gen. (Retd) Syed Ata Hasnain, consultant (Mock Exercise and Incident Response System) Brig. BS Thakar (Retd) leh consultant (Operation) Colonel (Retd) Nadeem Arshad te an lokal a ni.
State Level Mock Exercise on Earthquake Disaster-ah hian district headquarters tinah hmun thlan bik neiin lirnghing thlen thulha hmalak dan a taka entir a ni a, mithiam lokalte leh mithiam sawmbik ten mock exercise hi an endik a ni.
Mock exercise kharnaah Disaster Management & Rehabilitation minister Lalchamliana chuan, hlawhtling taka mock drill neih a ni chu lawmawm a tih thu a sawi a. Chutih rualin hmasawnna tur leh tan lakna tur tam tak an zirchhuak nia a hriat thu sawiin hengahte hian hma tan lak chhunzawm a ngai tih a sawi a ni.
Mipui leh official-te bakah chhiatrupna thlen huna chanvo nei zawng zawngten chet an lak dan tur leh an mawhphurhna an hriatchian phah lehzual a ngai tih sawiin, “Inzirtirna kalpui thin mah ila, a taka chhiatna a rawn thlen leh si loh hian inthlahdah a awl thin a, chawl loa zirtirna kalpui reng a tul a ni,” a ti.