Chhul hmawr cancer tam ber thlentu virus laka invenna tur hri danna pekchhuah tum a ni.
State Task Force Committee for Immunization chu Committee chairman, Health & Family Welfare principal secretary Esther Lalruatkimi hoin an thukhawm a. Natna hrang hrang laka invenna, immunization programme kalpui mek leh Mizoram dinhmun te, programme thar kalpui leh turte nen an thlir ho.
-- Advertisement --
Heng zingah hian kumin January 1 atanga kalpui zeng hri danna – fIPV (fraction Inactivated Polio Vaccine), December 2023 ralhmaa sentut natna – Measles Rubella tirem tura sawrkar laipui hmalakna kalpui dan tur, hmeichhe tam tak natna leh thihna thlen thintu chhulhmawr cancer venna – Human Papilloma Virus Vaccine pek dan tur leh, Covid vaccine bakah vaccine dang late chhinchhiahna tur U-WIN platform Aizawl leh Lawngtlai district-a kalpui chhin dan turte sawi ho a ni.
Committee chairman chuan natna laka invenna tur chu Mizoram tan leh thangtharte tan a pawimawh tih sawiin, immunization programme hrang hrang chu hlawhtling taka kalpui turin Health & Family Welfare departmentin malkhai chi a ni lo a. Department hrang hrang nena thawh hona tha neih a pawimawh tih a sawi.
Kum 2014 atang khan India ram chu zeng hri laka fihlim tawha puan a ni chungin, thenawm ram atangtea natna hri lo lut thei a nih avangin Polio vaccine hi tha taka pek chhunzawm zel a ni a. Ministry of Health & Family Welfare thuchhuah angin kumin January 1 atang khan India ram pumah fIPV hi dose thuma pek tan a ni a. Naupangin thla 9 a tlinin fIPV hi sentut venna lak rualin pek tur a ni. Dose 3 lakin zenghri lakah zaa 98 a veng tura ngaih a ni.
Khawvel pumah India ram hi hmeichhe chhul-hmawr cancer tamna ber pahnihna a ni a. Chhul-hmawr cancer tam ber chu Human Papilloma Virus vang a ni tih hmuh chhuah niin, hei hi vaccine hmanga ven theih leh, hei hian zaa 99.9 a veng tih hriat a ni. India sawrkar chuan kum 2023- 2024 atangin hmeichhe naupang/ tleirawl kum 9 atanga kum 14 inkar tan vaccine hi a thlawnin a pe dawn a. He vaccine single dose kalpui hmasakna tur state 7 thlan zingah Mizoram telin H&FW department chuan mi sing 6 vel tinzawn a tum a ni.