Chief minister a âng…

Tun hnaia state level bankers intawhkhawmna hmanpuitu chief minister Pu Lalduhoma chu Mizo mipuite thlavang hauhvin a âng a. A ân chhan hi Bank thenkhat CD Ratio hniam lutuk chungchang a ni. Hemi chungchang hi sawrkar kal ta hruaitute pawhina an ngaimawh em em thin a ni a; mahse, hminghmerha Banker-te hau phiar phiar ngam kha an awm ta chiah lo a ni awm e.
Chief minister hian CD Ratio lama hmasawnna a awm mek laiin, bank thenkhat CDR hniam fal, 40% aia hniam, thenkhat chu 20% pawh pha lo an awm thu sawiin, CD Ratio hniam zualte ni ngei tur Bank hming 8 a sawi chhuak nghe nghe a, chungte chu Yes Bank, Bandhan Bank, Axis Bank, ICICI, HDFC, CBI, Federal Bank leh NESFB te an ni.
Sawrkar thuchhuahin chief minister thusawi a tarlan hi, a nihna ang anga tarlan leh phu a ni a, chu chu hei hi a ni: “Kan ram atangin deposit in dawng khawm a, chuta tanga 20% vel kan ramah in puk chhuahtir a, a dang 80% vel state dangah in puk chhuahtir tihna a ni a. Hei hi Mizo mipuite zah lohna a tlingin ka hria. Sum dawn nan chauhva min rawn hmang bank hi kan mamawh lem lo. Hmasawnna hna min thawhpuitu tur kan duh. SLBC awm leh huna hma in sawnna report kan hmuh loh phei chuan ngawih ral kan tum lo. Kan ka kan an chuan, dawrtu nei lo bank in ni ve der thei a ni…” tiin.
CD Ratio chungchang hian tunhma atang tawhin ngaimawh a hlawh a, Banker ho intawhkhawmnaah sawrkar hotuten sawi chhuah chikah an nei thin a, mahse awmzia a nei tam lo hle thin. Chu chu kan tun dinhmun hian a rawn nemnghet a, tuna chief minister pawh hian a rawn tum leh chat a ni a, mipuiin SLB Committee inhmuhkhawm leh hun kan thlir thap tawh dawn tihna a ni awm e.
Banker te CD ratio 65-75% chin hi CDR hrisel anga ngaih a ni a, 60% pawh hi ngaihhnathiam theih a ni. Tuna Mizorama Bank tam zawk daih hi chu Bank hrisel lo an ni tihna a ni. Mihring hriselna nen tehkhin ta ila, calorie sang tak pai chi ei leh in tuihnai ei nghek nghek, lang thau mum kung, a ruka cholesterol sang fu si, calorie burn tura exercise la duh si lo, bawksawp thut thei dinhmuna ding an ni mai awm e. Chief minister vaukhan pakhat, ‘dawrtu nei lo bank’ an nih loh nan, tuna CDR hniam ho hian tan han la sauh sauh teh se.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More