Trudeau-a’n inthlan chuh tum tawh lo

Canadian Prime Minister Justin Trudeau chuan an ram inthlanpui lo awm leh tur chu a chuh dawn lo tih a puang a, October thlaa inthlan tura ruahman lawk chu sawn hma hret a ni mai thei bawk.
Nilainia Ottawa-a thuthar lakhawmtute a kawmnaah Trudeau chuan, “Keimahin thutlukna ka siam angin inthlan lo awm leh tur hi ka chuh dawn tawh lo,” a ti.
Thuthar lakhawmtute a kawm hma hian Trudeau-a hi Canada-a province hrang hrang premier-te nen an inkawm a, hetah hian US president ni mai tawh tur, Donald Trump-a a sorkar hnua zaikhaia lo dawnsawn dan tur an sawiho.
Trudeau-a hian politics-a a inhman tawh loh hnua a awm dan tur chu a sawi chiang thei lo va, “Ka la ngaihtuah ang, chutiang ngaihtuahna hun thawl ka la nei thei lo. Canadian-ten he hna ropui tak thawk tura min thlan avang hian ka hnaah ka tul em em rih a ni,” a ti.
Trudeau-a hi kum 2008 khan a vawi khat nan Quebec-a Papineau riding (Canada-a constituency) atan thlan tlin niin a dawt inthlanah pawh House of Commons-a thu zui turin thlan leh a ni a. Kum 2021 inthlanah pawh kha a bial ngaiah vek thlan tlin leh niin vote tla 50.3% a hmu phak.
January 6-ah khan Trudeau-a hian rorel lai, Liberal Party hruaitu tur thlan fel a nih hnuah prime minister atanga a bân tur thu a lo puang tawh bawk a. Hruaitu thlanna hi la kal mekin March 9-ah zawh tur niin a bâng zui ang.
Amah thlaktu tur inchuhnaa tel tur hian January 23 thleng hming pek theih a ni a. A langsar zingah Bank of Canada leh Bank of England governor hlui, Mark Carney leh deputy prime minister hlui, Chrystia Freeland te an tel a. Carney hian Ningani (India-a Zirtawpni) hian Edmonton-ah a chuh tur thu a puan rin a ni a, Freeland-i pawh hian Thawhtanniah a puan rin a ni.
December 25-a kum 53 tling, Trudeau-a hi April, 2013 khan Liberal Party hruaitu a ni tan a. Kum 2015 nupui lai khan prime minister nih tuma campaign tanin October 19-ah a ni zui ta a. Hemi tum an ram inthlanah hian House of Commons-a seat 338 awmah 184 an la.
Kum 2019 leh 2021 inthlanah pawh sorkar siam thei khawpin a chakpui zui a ni.
Tun hnaiah Liberal Party hi an tlahniam nia ngaih a ni a. Mipui ngaihdan laknaah 20% vel chauhvin an thlawp tawh laiin eptu, Conservative Party chuan 25% dawn thlawptu an nei tawh.
Nikum kum tawpah khan Trudeau-a hian party chhunga helna tawngin finance changtu, Freeland-i chu December 16 khan a bâng a. A hnung zuiin MP 100 dawn – Ontario, Quebec leh Atlantic region vela mite pawhin bân mai an tum a. Hei hi prime minister atanga bân a tum chhan lian tak pawh a ni zui ta a ni.