Child Development Centre hawng

Child Development Centre hawng
Ramhlun South ami Child Development Centre Mizoram chu Thawhlehni khan Aizawl North II bialtu MLA Dr Vanlalthlana chuan a hawng.
Child Development Centre Mizoram hi naupang rilru leh taksa lama harsatna hrang hrang neite enkawlna hmun a ni a. Mithiam – naupang doctor, clinical psychologist, occupational therapist, speech therapist leh special educator te awmkhawmin enkawlna kimchang tak an pe thin. He hmunah vek hian kumin academic year atan pre-school, day-care leh lower KG kai thei naupangte tan school section hawn tel a ni bawk. School section hi inclusive set up – naupang harsatna nei leh neilote len vek theihna tura duan leh kalpui a ni.
Naupang, taksa leh rilru lama harsatna neite enkawlna tur he Centre din a ni chu lawmawm a tih thu MLA hian sawiin, hemi atana building luah tirtute chungah pawh lawmthu a hrilh a. He centre-a thawktute chuan hmangaihna tak tak nen naupang harsatna neite enkawl a, lo kuangkuah zel turin a chah a ni.
Child Development Centre hi kum 2021-ah Dawrpui-a mimal building hawha tan a ni a. Tunah hian thawktu 20 vel awmin tun thlenga naupang enkawl ngai inziaklut hi 1300 vel an ni tawh. He Centre hian mithiam kaltlangin thiamna hrang hrang hmangin enkawlna an pe a. Thawktute hian taksa leh rilru lama harsatna nei naupangte leh an chhungte chhawmdawlin, an harsatna sutkian pui a, kawng tinrenga hma an sawn theihna’n leh naupang dinhmun zirchiangin enkawlna hna an thawk thin.