Chilean club zawm tur Vozinha

On Jul 27, 2026 0 0

Chilean club zawm tur Vozinha
Kumin World Cup kaltlanga hming chher hluai Cape Verde goalkeeper Vozinha chuan Fifa tournament lian bera a chetthat hlawkpuiin club khelhna tur a nei leh dawn ta a, Chilean side Colo Colo nen an inrem fel tawh.
Kum 40 mi Vozinha hi a club hlui Portuguese second division side Chaves-a a contract a hman zawh hnuin club zawm nei loin a tei lawp lawp a, chutih chhung chuan World Cup khelh a lo hun a, champion zui ta Spain lakah Cape Verde chu draw result a neihpui ta mai a, a hnu lam zelah pawh beisei phak baka a rawn chetthat takah chuan club thar a nei ve leh ta tih Colo Colo president Anibal Mosa chuan sawiin, “Vozinha hi Colo Colo player a ni dawn,” a ti.
Mosa chuan sawi zawmin, “Ni reiloteah hian Chile a rawn thlawklut ang a, medical examination-te a paltlang hnuin Estadio Monumental-ah kan player thar ni chunga phochhuah a ni ang,” tiin an inremna a sawi chhuak.
Mosa sawi zel danin, kumin World Cup-a a khelh dan khan an kianga kal a phu a, an club tan poawh sumdawnna lama an hlawkpui tel tur thu a tarlang tel a, dan ang takin he transfer hi tihfel la ni chiah lo mah se club president berin heti ang thu hi a sawi chhuak tawh a, club lam pawhin social media lamah Vozinha sam kir chuat thlalak hi an pholang tawh nghe nghe.
Chilean-ho khawpui Santiago-a inkulh Colo Colo hi an ram top division Liga de Primera table-a a sang ber niin, keeper tawnhriat ngah leh World Cup-a hmingchher hlimhlawt an senglut leh tur hian dinhmun sang zawkah a hlangkai zui zel thei dawn em tih chu hunin a la hril ang chu.
Group stage-a Spain inhnehtawk chunga an World Cup point hmasaber hlawhchhuak thei Cape Verde kha kumin World Cup khel tura tling zinga ram te ber dawttu niin, last 32 lamah pawh champion lai Argentina an barakhaih teuh hle a, Lionel Messi & Co. kha extra-time hial an khelhpui hnuah 3-2-in an tlawm zui ta a nih kha.
Dinhmun sang taka Cape Verde hlangkaitu langsar ber Vozinha kha tunhma lamin a lo teikual nasa ve tawh a, Slovakia, Angola, Moldova, Cyprus leh Portugal ramahte club football a lo khel ve zak zak tawh a ni.