Chin hriat loh pathum bo thiin chhar

Chin hriat loh pathum bo thiin chhar
Ni 4 chhung an chin hriat loha awm tawh Siaha-a mi pathum chu Ningani khan thiin chhar an ni.
Thudawn danin, March 19 khan Siaha ami Suitei te hi an mikhual mi pahnihte nen an chhuak a, hemi hnu hian an chin hriat zui a ni lo.
Myanmar lam mi mipa pahnih mikhual an nei a, heng mite hian Siaha bazarah mamawh lei tumin dawr tlawh kual pawh an nei nual nia sawi a ni. Pathianni kalta khan heng an mikhualte nen hian lirthei hire-in an chhuak a. An chin hriat zui a ni lo.
Police lam leh khawtlang lamin a ruka an zawn mek laiin Ningani khan Myanmar lam hnaih, Chhimtuipui bul Ainak khaw mite chuan ramah ruang pathum an chhar a, an taksa hi a kang chhe hle a, lirthei khalhtu B. Lalthafamkima s/o B Duhchhunga, Lungpher chu a ruang hmuh tlak deuh ber niin, a ni aTang hian an chin hriat loh dang pahnih Suitei Chinzah (48) leh Bablu Talukdar (37) Siaha te ruang nia finfiah a ni.
Bablu Talukdar hi Suitei te ina awm ve niin, amah hi Mizoram Home Guard a ni tih sawi a ni.
Suitei te hi Myanmar atanga Siahaa pem lut niin dawr lian ve tak an siam nia sawi a ni bawk.
An ruang hmuhnaah hian an lirthei hire erawh hmuh tur a awm lo.
He thil thlengah hian Suitei mikhualte hi rinhlelh ber an ni a. Thudawn pakhatah chuan Myanmar hel pawl pakhata tel nia sawi an ni.
Thil thleng chungchangah hian thu leng vel tam tak a awm a, thuchiang erawh he chanchin buatsaih lai hian hriat theih a la ni lo thung.
Driver B Lalthafamkima hi an khua Lungpherah phurh nghal niin Suitei leh Bablu ruang hi Siaha thlenpui niin Siaha-ah hian khawtlangin an lo hmuak a ni.