China-ah Myanmar mafia lawk panga tihhlum turin ti

China-ah Myanmar mafia lawk panga tihhlum turin ti
Beijing-in Asia chhimchhaka inbumnaa thil kalpui laka beihpui a thlak kal zelah Chinese court chuan Myanmar mafia lawk tak tak panga chu tihhlum turin a hrem.
Bai family an tiha tel leh an thawhpui mi 21 chu mi bum, mi that, mi hliam leh dan bawhchhiatna dang avangin thiam loh chantir vek an ni tih court website-a tar lan a ni tih an ram sorkar chanchinbuin a tar lang.
Heng chhungkua hi kum 2000 chho vel atanga insiam tan niin khaw chengker leh rethei tak, Laukkaing atanga bul tan mai ni mah se pawisa khelhna hmun lian leh nawhchizawrhna hmun lian tak thleng an luah tawh a ni.
Tun hnaiah mi sang tel, a tam ber Chinese bum chhuakin chhuak thei tawh lovin an dah a, an sawisa a, mi dangte bum lehchhawng tura chhawrin an sum chevel hi tluklehdingawn tel a tling.
Mafia boss Bai Suocheng leh a fapa, Bai Yingcang chu Shenzhen Intermediate People’s Court-in thi tura a tih panga zingah an tel a. Yang Liqiang, Hu Xiaojiang leh Chen Guangyi te an tel bawk.
Bai family mafia-a tel mi pahnih erawh thi tura hrem tawhna hlihsak leh rih an ni a. Panga chu dam chhung tang tura tih an ni a, mi dang pakuate chu kum hnih atanga kum 20 thleng tang tura tih an ni hlawm.
Bai chhungkua hian sipai pawl pawh an nei a, cyberscam leh pawisa khelhna hmun lian tak tak 41-ah an inbun niin thuneituten an sawi.
Pawikhawihnaa an chetnaa sum che vel hi Chinese yuan tluklehdingawn 29 vel a tling a. Chinese paruk thihna, mi pakhat intihhlumna leh mi eng emaw zat hliamnaah an inrawlh bawk tih sorkar chuan a puang.
Court-in inhremna na ber hmanga a hrem tur hi China-in Asia chhimchhaka inbumna awm thin tihtawp tuma hma a lakna pakhat a ni a, hetiang ti thin pawlte vauna chi khat a ni.
September thla khan Chinese court hian Laukkaing atanga chhuak tho, Ming chhungkuaa tel mi sual pawl mi 11 chu thi turin a lo hrem tawh bawk.
Anni hi kum 2000 vawr vel atang tho khan tuna Myanmar-a sipai sorkar hotu, Min Aung Hlaing-a puihna nen an indin chhuak a. Laukkaing-ah hian a hmaa warlord thin awm ta lo thlaktu atan leh thawhpui atan hetiang hian a siam lian a ni.
Hetianga mi sual pawh zingah hian Bai hi an lian ber niin Bai Yingcang-a chuan a lo sawi tawh thin thung.
Beijing hian Myanmar-a sipai sorkar hi Laukkaing-a inbumna kalpui thinte laka che chhuak turin a lo nawr tawh thin a. Kum 2023 pawh khan Chinese police chuan mi sual pawla mite man theihna tur thupek a chhuah nghe nghe.
Kum 2024 tir lamah khan Myanmar hian Bai dintu ber, Bai Suocheng-a chu Beijing hnena a hlan zingah a tel nghe nghe.