China-in thlaah mihring kah kai tum

Neil Armstrong leh Edwin ‘Buzz’ Aldrin te bak mihring zinga thla leilung rap an la awm loh laiin, India-in vawiin chawhnu dar 2:30 velah a thla leilung daidar tura a beihpui thlak vawi thum nan Chandrayaan-3 a kapchhuak dawn a, hetihlai hian China chuan 2030-ah thla leilungah mihring kah kai an tum thu an puang ve leh ta bawk.
China Manned Space Agency-a deputy chief engineer Zhang Hailian chuan thla (moon) kawng (orbit)-ah rocket pahnih an thlawh luh tir ang a, chumi hnuah astronaut te chu thla leilunga tum tura siam hmangin thla leilungah an tum leh dawn a, chutah scientist ten an tih tur tul te tizo a, sample te a lak khawm hnuah astronaut te chu chunglama lo viltu spacecraft-ah an thlawk lut leh ang a, chumi hnuah lei (earth)-ah an rawn kir leh dawn niin a sawi.
Thla leilungah hian 1968-1972 US Apollo mision-in Neil Armstrong te a kah kai hnuah mihring kah kai an la awm leh ta lo a, tunlai hian China leh US te chu thlaa mihring kah kai leh tumin an intlansiak nasa hle a ni. Thlaa mihring khawsak tir theih hi Sikeisen (Mars) mission atan a pawimawh dawnin an hria a ni.
Hetihlai hian Indian Space Research Organisation (ISRO) chuan Chandrayan (Mooncraft)-3 chu thla a kah kai tumin tunah chuan thinphu dep depin an awm mek tawh ngei ang a, kum li liamta khan thlaa tum tura an rocket kah chhuah chu thlaa a tum hma lawkin chin hriat lohin a bo ta kha a ni a, mahse, tun tumah chuan a hmaa an chetsualna te hre rengin Chandrayaan-3 hi chu hlawhtlinpui ngei an tum tawh a ni.
Chandrayaan-3 mission hi a hlawhtling thei a nih chuan India-a Russia, US leh China dawta thla leilunga hlawhtling taka rocket tum thei ram palina a ni dawn a ni. India hi a space programme a thang duang hle a, 2008 khan thla hel turin rocket an lo kapchhuak tawh a, 2014-ah Mars hel turin satellite an kapchhuak hlawhtling tawh bawk a, Asian ram zingah hetiang tithei hmasa ber an ni nghe nghe a, 2017-ah chuan ISRO hian satellite 104 a kapchhuak leh der tawh a ni.