Chinese spy balloon finfiah zui zel

Chinese-in spy balloon programme a kalpui chu finfiahna a awm zel a, tun hnai lawkah pawh Japan leh Taiwan vansangah hmuhin a awm a.
Japan chuan balloons te chu an ram chhungah an thlawh thu sawiin hun dangah chuan kahthlak an nih zel dawn tawh thu a sawi zui bawk a. China chuan he mi chungchangah hian sawi engmah a nei zui duh lo thung.
Kumin kumtir lam khan US coast a Chinese spy balloon kahthlak a nih avang hian US-China inlaichinna chuan a chhiat phah hle tawh a.
China chuan January thla tawp lama north-west US a balloon hmuh te chu civilian airship, meteorology te ang atana scientific research atana hman tia sawiin beisei loh deuha US ram chhunga thlawk lut palh tiin a sawi a ni.
John Culver – CIA tana East Asia analyst ni thin chuan balloon te hi tum khat chauh hmuh a ni lo va, tun hnai kum nga chhungin hmuh zeuh zeuha awm reng tawh a ni tiin a sawi a. Chinese balloon te hi long-range mission atana thuam niin khawvel hel tura ruahman an ni, tiin a sawi.
China balloon te hi East Asia bikah phei chuan hmun hrang hrangah hmuhin a awm reng fo tawh a, artificial intelligence company Synthetaic dintu Corey Jaskolski chuan September 2021 khan balloon pakhatin Japan hmar lam a fang lai an hmuh thu a sawi a.
Jaskolski chuan heng balloon te hi China ram chhung ril tak, Mongolia chhim lam atanga kahchhuah ni ngei an ngaih thu a sawi bawk a. Heng hmun te hi Japan thian tha US-in American forces station a dah hnemna hmun a ni.
Yuko Murakami, Japanese ministry of defence chuan an sorkar chuan ni tinin enfiahna a neih zel tawh thu sawiin Japan mipui leh ram him nan balloon te chu an kahthlak zel tawh tur thu a sawi bawk.
US State Department chuan heng Chinese balloon te hian signal intelligence an keng telah a ngai a. US ram chhunga kahthlakah pawh balloon te chuan antenna thahnem tak data lakhawm thei te leh geo-locating communications te pawh a keng tel tiin a sawi bawk.