Vladimir Putin-an hremna lekkawh ngei tum

Russian President Vladimir Putin chuan kar kaltaa Wagner mercenary te helna chawkchhuaktu an hruaitute chu ‘Russia thisen chhuahna in khat se’ an duh a ni tiin a sawi.
Putin chuan helna chawkchhuak tute chu hrem an nih ngei a tiam bawk a. Wagner sipai regular-te chu ‘patriots’ tia sawi thungin army an zawm ang a, Belarus-ah kalin an lo let leh ang tiin a sawi.
Putin paihthlak tum nia puh hnawltu Wagner boss Yevgeny Prigozhin erawh hming hmerhin a sawi lang lo thung a.
Wagner te hi mercenary private army te niin Ukraine-ah Russian regular army te nena tangduna indonaa tel te an ni.
Wagner te hian Russia sorkarin thunun a tum an duh lohna lantir nan helna chawkchhuakin Russian city an thuhnuaiah an dah hman a, chutah hmar thlang lamah Moscow pana an kal mek laiin an tum an thulh leh a ni.
Russia sorkar chuan a hmain “volunteer formation” (Wagner te sawina) te chu Ministry of Defence contract pek an ni ang a ti a, hei hi Prigozhin-an Wagner a thunun chhuhsak tumna tia ngaih a ni.
Chutah lungawilohna lantirin an hel zui a, mercenary chief Prigozhin chuan an helna chhan chu Ukraine indonaa Russia defence official te thiltih dik loh avanga lungnih lohna lantirna a ni tiin a sawi a. Mahse, Russia ram tana tha tur chauhin chet a la thin tiin a sawi bawk.
Hei hi Prigozhin-an helna an chawh chhuah hnua a thusawi hmasak ber te niin a hnuah erawh a laka criminal charge tinte paih ni bawkin Belarus a pan zui a, mahse, Russian state media-te chuan Prigozhin chu chhui chianin a awm mek an ti thung.
Helna an tihtawp chhan sawiin Prigozhin chuan ‘Russian sipaite thisen luanitr a duh lo’ tiin a sawi a, chutih rual chuan Moscow an panna an titawp chu Russian civilian-te chuan pawi an ti tiin a sawi bawk.
Russian thuneitute paihthlak a tum ngai reng reng loh thu a sawi bawk a. Mahse, engtiangin nge chet a lak zel dawn tih erawh hriat a ni lo thung.
Putin erawhin Russian mipuite hnena thusawina a neihah Moscow pana helna chawhchhuah tumte chu an chungthu rel a ni ang tia sawiin a thian tha ni reng Prigozhin chet dan chu hnung lam atanga invih ang tiin a sawi bawk a.
President Putin thusawi ber chu helna chawkchhuaktute chu ram leh mipuite hmelma an ni tiin hei bakah hian Russian hmelma ten thisen chhuaha inthenhran thlentir an tum tihhlawhtlin tumna tiin a sawi bawk.
Hei bakah hian Putin chuan a thutiam hlenin Wagner group te thisen chhuah hauh lova Belarus pan te chu an lakah hremna lekkawh a ni dawn lo, a ti bawk a.
“Wagner group commander leh sipaite thutlukna dik siamtute hnenah lawmthu ka sawi duh a. Thisen chhuah duh lovin thutlukna an siam a ni,” tiin a sawi a.
“Tunah chuan Russia tana in thawhna chhunzawm zel nan Ministry of Defence nen contract in ziahna hun remchang a inhawng a, military law leh enforcement structure te in zawm a ngaia emaw in chhungte hnenah in let leh thei bawk,” tiin Putin chuan a sawi a.
“A duh zawngte chuan Belarus an pan thei a, an hnenah ka thutiam te tihhlawhtlinin a awm ang,” tiin Putin chuan a sawi bawk a. Thisen chhuahna thleng mai thei te pumpelhin a awm a, organisers ten an chetlak dan chu dan kalh a ni tih an hrefiah hman a ni tiin a sawi bawk.
Putin chuan Russian society lungrualna fakin leh Belarusian leader Alexander Lukashenko chu inremna siam a nih theih nana a hmalakna avangin a fak bawk a.
Kar kalta khan a thla a thla Wagner leh Russian sipaite inkara inepna a awm hnuah helna chawhchhuahin a awm a. Kar kalta Zirtawpni zan khan Awagner mercenary te chuan Ukraine ramria an camp chu chhuahsanin chhim lama Russian city Rostov-on-Don chu an pan a.
He khuaa regional military command hmunpui chu an thuhnuaiah dah nghalin Prigozhin chuan an chetlak dan chu ‘march for justice’ tiin a sawi a, Russia ram pumah security lamah harsatna nasa tak a awm tiin a sawi.
Mercenary bosss chuan an chetlak dan avangin Russian sipai ten nunna an chan phah tia sawiin hei hi Wagner tena attacking helicopter an kah thlak chungchang a sawina a ni a. “Mahse, lei lamah sipai pakhat pawh kahhlumin a awm lo,” tiin a sawi thung a.
“Aircraft kan kap thla kha a pawi kan ti a, mahse, bomb leh missile hmanga min beih a tum vang a ni,” tiin a sawi zui bawk.