Chirha engineer leih vangin Maharashtra minister tang dawn

Maharashtra court chuan BJP Minister Nitesh Rane-a chu kum 2019-a chirh tuia National Highway Authority of India (NHAI) engineer leih thubuaiah thiam loh a chantir a, thla khat chhung lung in tang turin a hrem.
Kum 2019 khan Mumbai-Goa kawngpui chhe lutuk avanga lungawi lohna an lantirnaah Rane-a leh a thlawptute chuan NHAI Deputy Engineer Prakash Shedekar-a hi chirhin an theh a ni.
Union minister hlui, Narayan Rane-a fapa, Rane-a hi thubuai hrang hranga puh mi 30 zingah a tel a, buaina siam, vantlang tana thawktu tihbuai nana beih leh mi sual inrawlhna te pawh a tel a. He thil hi Congress party-a a awm lai a ni.
Sindhudurg court chuan finfiahna tling a hmuh loh avangin hi he thubuaiah hian Rane-a telin puh zawng zawngte thiam a lo chantir vek tawh a; mahse, Kankavali MLA hi IPC section 504 (intentional insult meant to provoke a breach of public peace) hnuaiah vantlang tana thawktu a bei a, an hna thawk thei lo tura a tihbuai avangin thiam loh chantir a ni ta thung a ni.
Court chuan Rane hremna chu a tikhawtlai lailawk a, court sang zawka theihna hun a pe a, puh dang 29 chu thiam chantir an ni bawk.
Aadditional Sessions Court Judge V S Deshmukh-a chuan, “Rane-a thil tum chu hnathawh that lohna leh mipuiin harsatna an tawhte dodalna atana aw chhuah ni mah se vantlang hmaah sorkar hnathawk tihmualpho emaw, sawichhiat emaw tur a ni lo,” a ti.
“Hetiang thil hi a thleng chhunzawm zel chuan mipui tana thawktute chuan zahawm takin an hna an thawk thei dawn lo a ni,” a ti a. ‘Thuneihna hman sual’ a ti bawk.
Rane hian July 4, 2019 khan NHAI Sub-Divisional Engineer hi Kankavli-a Gad lui chunga lei siamah Mumbai-Goa Highway zau zawka siam tur hna thawh mekte enpui turin a ko.
Thu remtute sawi dan chuan Rane-a leh a hnungzuitute chu kawngpui siam hna tha lo leh tui tling avangin an lungawi lo hle a. Engineer hi chirh tuiin an leih a, vantlang hmuhah an kaltir lui a ni.