Churachandpur-ah zan curfew kalpui

Manipur-a Churachandpur district-a buaina chhuak vangin boruak a ralmuang lo hle a. Kar kalta Inrinni a mi tu tih hriat loh tena sorkar building an hal hnuah boruak a tang zual a ni.
Inrinni zan atang khan thuneitute chuan zan curfew an puang nghal a, chhun lamah lungawi loten open gym hmunhma halin chair leh bungrua eng eng emaw an tichhe nasa hle bawk.
Churachandpur buaina hi state sorkar in tun hnaia dan kalha poppy chingtute hnawhchhuah leh an hmunte a tihchhiatin a hrin a ni a, sorkar chuan heng hmunte hi ram ngaw humhalh lai tiin a sawi.
Director General of Manipur Police P. Doungel leh senior officials chuan Inrinni khan Churachandpur district hi an tlawh nghal a.
Police-te chuan Zirtawpni zing khan mi thenkhat ten Forest Ranger Officer building, Tuibong area ami chu an hal an ti a, Inrinni tlai dar 5 atanga a tuk dar 5 thlengin curfew puan zui a ni bawk.
Buaina chhuak thar a awm loh nan security khauh taka kalpui a ni chungin boruak a la tang hle tiin police officer te chuan an sawi a.
Veteran Congress leader leh CM tum thum ni tawh Okram Ibobi Singh leh State Congress president K. Meghachandra Singh te chuan BJP sorkar leh Chief Minister chu ‘tribal leh forest land kaihhnawihah policy dik lo a nei’ tiin an sawisel na hle a.
Kar kalta Zirtawpni khan CM Biren Singh chuan Churachandpur tlawh tum a nia chu pawh chu thulh a ni zui a. A sorkar chuan drugs hluar nasa tihrem a tum thu sawiin Manipur-ah poppy chinna te chu tihchhiat vek a ni dawn tiin a sawi zui bawk.
Kar kalta Ningani khan police leh tualchhung mite inkarah Sadbhavna mandap-ah inbeihna thleng hmasa berin police-te chuan Myanmarese mi leh sa dan kalha India lutte chu sulsutu zingah an tel an ti bawk.
Manipur sorkar hian tun hnaiah dan kalha sak tiin Biak In pathum a tichhe tawh bawk a. Chungte chuan lungawilohna nasa tak a siamsa tawh bawk a ni.
Lungawilohna lantirna hi poppy chingtute hnawhchhuah leh tihchhiatsak duhlohna avanga kalpui a ni ber a, buaina nasa zawk a chhuak zui ta zel a ni.