Sudan buainain khawvel nghawng thei ti

Sudan Prime Miinister hlui Abdalla Hamdokh chuan an ram buaina chu a zual zel a nih chuan Syria leh Libya ram buaina aia turu zawkah a chhuak thei ang tiin a sawi.
Sudan army pangngai leh paramilitary Rapid Support Forces (RSF) te inbeihna chu a kal zel a nih chuan ‘khawvel tan mangchhia’ a ni ang, tiin a sawi bawk.
Pathianni khan indo thlawhna leh anti-aircraft te chu Khartoum-ah a ri hriat nia sawi a ni a. Army te chuan heavy artillery hmangin kiltin atangin an bei tiin an sawi bawk.
Sudan indona hi 15 April- a intan kha niin mi sang tam takin hlauhlawpin an ram an chhuahsan phah tawh a.
Kar kalta Ningani khan inkahhaina siam a ni a, a hnuah US, UK lehUN te hmalaknain darkar 72 dang atan pawhsei leh a ni.
Hetih lai hian Port Sudan-ah chuan an ram chhuahsan duh an zi mup mup thung a, a tam ber te chuan Saudi Arabia leh Yemen pan an tum a ni.
Khawvel ram hrang hrang ten an khua leh tuite lachhuak mekin UK chuan operation hnuhnung ber an neih zawh tawh thu an sawi a, Sudan atangin mi 1,900 vel an thiarchhuah thu an sawi a
US sorkar thung chuan Jeddah, Saudi Arabia kaltlangin an khua leh tui tam zawk lakchhuah tuma hma an la lak mek thu sawiin Americans za tel te chuan Sudan hi an lo chhuahsan sa tawh thung.
Kenyan capital Nairobi a thusawina a neihah Hamdok chuan khawvel ram te chu tanrualin Sudanese army chief leh RSF leader te chuan peace talks an neih ngei theih nana hmalak a ngai a ti a.
“Sudan hi ram lian a ni a, hnam hrang hrang awmna a ni a, a buai zel chuan khawvel tan mangchhia a tling ang” tiin a sawi a. “He indona hi army leh hel pawl tereuhte inbeihna a ni lo. Army pahnih training nei tha leh sipai tha tak ve ve te inbeihna a ni tlat,” tiin a sawi.
Hamdok hi Sudan prime minister tum hnih ni tawh niin tuna buaina thleng mek chu a zual zel a nih chuan Syria leh Libya tualchhung buaina ai daiha nasa leh nghawng nei na zawk tur a ti bawk.
Sudan buaina hi army commander Gen Abdel Fattah al-Burhan leh RSF chief Gen Mohamed Hamdan Dagalo, Hemedti tia hriatlar zawk tena civilian rule-a Sudan dah dan tura ngaihdan inang lo an neihin a hrin a ni a. A bik takin RSF sipai 100,000 te Sudan army-a rin luh tumna vang a ni deuh ber.
Khartoum khawpui chu inbeihna thlen nasatna niin Sudan army te chuan mipuite chu pawn chhuak lo leh tukverh bul hnaia awm lo turin an ngen a, Khartoum khawpui chhungah RSF tena hmun an lak chhuhsak tumin tank leh artillery te an chhawp lut bawk a.
Khartoum bakah hian western Sudan a Darfur a El Feneina ah chuan tharum thawhna a hluar hle nia sawi niin militia group te chuan rukruk kalpuiin leh market te chu an hal zel tia sawi a ni.
Hetih lai hian Hemedti chuan inbeihna a tawp hma chuan inremna dawhkan an kil dawn lo tia sawiin a sipaite chu inkahhaina pawhsei a nih hnuah Sudan army te chuan an bomb zui nasa tiin a sawi a.
“Sudan tihchhiat hi kan duh lo” tiin Hemedti chuan sawiin army chief Gen Abdel Fattah al-Burhan chu tharum thawhna chhuak mekah a dem thu a sawi a ni.