HUNTRIX ‘Golden’ kar 17 a No.1 ta

On Nov 27, 2025 18 0

HUNTRIX ‘Golden’ kar 17 a No.1 ta
KPop Demon Hunters soundtrack HUNTRIX “Golden” chu Billboard Global 200 chart-ah a No.1 a, he chart-ah hian kar 17 a No.1 tling ta. Hetihrual hian Mariah Carey Krismas lengzem hla “All I Want for Christmas Is You” chu chart top 10-ah a rawn lang ve leh ta a, ‘Where Is My Husband!’ leh ‘So Easy (To Fall in Love)” te pawh top 10-ah an lang.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only streams (subscription leh ad-supported audio leh video music services) leh download sales te chu tehna pawimawh a ni.
HUNTRIX “Golden” hian kar khat chhungin stream maktaduai 102.3 leh sales 10,000 a la nei thei a, hei hi a kar 17 nan chart-ah a No.1 pui leh ta a ni. He hla hi Global 200 chart a No.1 nih rei theihah pathumna a ni pha ta a, Mariah Carey “All I Want for Christmas Is You’ (kar 19) leh Lady Gaga & Bruno Mars ‘Die With a Smile’ (kar 18) te chiah a pha lo.
Chart No.1 hlui, Taylor Swift ‘The Fate of Ophelia’ chu No.2-ah bawk awm lehin, Olivia Dean ‘Man I Heed’ chu No.4 atangin No.3-ah a insawn a, chart No.1 hlui Alex Warren ‘Ordinary’ chu No.3 atangin No.4-ah a tawlh a, Swift hla dang ‘Opalite’ chu No.5-ah bawk a la awm.
Krismas rim a nam leh tan ta bawk a, Mariah Carey Krismas lengzem hla ‘All I Want for Christmas Is You’ pawh top 10-ah a rawn lang leh ta a, kar khat chhunga stream maktaduai 39.4 leh sales 3,000 neiin, No.18 atangin No.6 a kai leh ta a ni.
‘All I Want for Christmas Is You’ hi 1994 a a tlangzarh daih tawh kha ni mah se Krismas vuakvet-ah a lar thar leh thin a, Billboard-in Global 200 chart an siam tan, September 2020 atang kan kumtin December thlaah chuan a la rawn No.1 leh ta ziah a, kar 19 No.1 tling tawhin, he chart-a No.1 ni rei ber a ni a, kuminah pawh November thlaah top 10 a rawn lang thei a, December-ah chuan kar hnih emaw kar thum emaw tal chu a No.1 leh ngeiin a rinawm.
RAYE hla ‘Where Is My Husband!’-in stream maktaduai 36.1 neiin, No.13 atangin No.7-ah a invawrh a, he chart top 10-a lang thei hla pahnih a neihna a ni a, 2023 January khan a hla dang ‘Escapism’ featuring 070 Shake chu No.7 a lo kai tawh bawk.
Olivia Dean hla dang ‘So Easy (To Fall in Love)’ pawin stream maktaduai 35 neiin, No.14 atangin No.8-ah a invawrh a, he chart top 10-a hla pahnih a neihna a ni bawk.
Billboard Global 200
Top 10:
1 Golden – HUNTR/X: EJAE, Audrey Nuna & REI AMI
2 The Fate Of Ophelia – Taylor Swift
3 Man I Need – Olivia Dean
4 Ordinary – Alex Warren
5 Opalite – Taylor Swift
6 All I Want For Christmas Is You – Mariah Carey
7 Where Is My Husband! – RAYE
8 So Easy (To Fall In Love) – Olivia Dean
9 Back To Friends – sombr
10 Die With A Smile – Lady Gaga & Bruno Mars