City-in Bouaddi leh Fernandez la beisei zel
City-in Bouaddi leh Fernandez la beisei zel
Barcelona lama an midfielder tha Rodi an chhuah hnuah Manchester City chuan an target pui ber pahnih Ayyoub Bouaddi leh Enzo Fernandez lakluh tumin tan an la khawh tluang zel.
Etihad club hian Morocco midfielder Bouaddi lei tumin Ligue 1 club Lille an dawr hlawhtling tep tawh nia sawi thawm a ring sawt hle a, tunkar chhung ngei hian a hmawr bawk hman an duh a; chutih laiin French club Lille hian an rawlthar kum 18 mi manah euro maktaduai 100 (£85.6m) zet an chhiar fun a, hei hian inbiakna a tisawt lo deuh niin a lang!
Premier League club hian Chelsea supporter thenkhatin an boo khum mek Enzo Fernandez pawh an la beisei kal zel a; Bouaddi leh Fernandez an sengluh theih chuan Nottingham Forest atanga Elliot Anderson an lo hruailuh tawh nen midfielder pathum manah an inseng ve hle dawn tih a chiang a, he lam department-ah chuan an duhkhawp an ngah thei thuak tawh tura ngaih a ni!
An target pakhat zawk Bouaddi hi kumin World Cup laia hming chher zinga mi niin, quarter-final an luhna kawngah Morocco tan match rukah match nga bultantu zingah a tel a, kum 2024 Champions League match pakhata Real Madrid an hneh tum pawh khan kum naupangtein an lo khel tawh ngat a ni.
England player insawhnghet chho mek, box-to-box midfielder an tih mai Anderson nena an inkawp thei a nih ngat chuan tawrhhlelhawm ve tak tur an ni ang!
A kum 16-na piancham a lawm hma ni thum la awm, October 2023-a a debut a nghahchhuah hnu khan Bouaddi hian Lille tan game 88 khel tling tawhin, season liamta khan Ligue 1 lamah Lille kha pathumna a nihpui.
City target dang Fernandez hi a club vawn lai Chelsea chuan hralhchhah theih hun bithliahin, chu mi chhung chuan Etihad club nen hian an inrem hman lo a, a nih tak rau rauah chuan tun season kawl zui leh law law an duh a, chutih laiin Argentina midfielder lakah City an la beidawng duh rih lo.
September ni 1 khin kumin nipui thawt laia transfer kal mek tawp hun tur (deadline) a ni a, Manchster khaw club hian an ngamna zat pun chungin Blues hi an dawr leh ngeiin a rinawm a, City boss Enzo Maresca hi a tum a ruh hmel em avangin deadline ral hmaa an intihfel hman rin a ni tho.