City in champion an hnaih

Nilai zana English Premier League inkhel pawimawh takah, champion lai Manchester City chuan Etihad Stadium-a an mikhual Arsenal chu 4-1 ngawtin an lo hneh a. City hi champion an hnaih leh zual a, an champion leh champion loh chu an kut zala tla liau liau a ni tawh. An elpui lian City lakah an tlawm nawn leh hnuin Arsenal manager Mikel Arteta chuan champion thei an nih thu a sawi a, beiseina an la nei thu a sawi.
EPL 2022-23 champion tur tihchianna ang hial a ngaih leh ‘EPL’ final ti hiala sawi inkhel pawimawh tak chak zawk zawk hi champion zui tura ngaih an ni a. City leh Arsenal tan a pawimawh em vangin chak ngei tumin thapui an thawh ve ve. Inkhel pawimawh takah an khingpui ten Erling Haaland an veng nasa dawn tih hriain Pep Guardiola chuan a laiah Kevin de Bruyne a tlan tam tir a, Gunners rin lawk loh ang takin chet a thawh. Pep hian a thluak a vawrh fuh viau a, De Bruyne hian goal hnih a thun a, Haaland-a’n goal khat a thun tho bawk. Arsenal in an player pawimawh William Saliba an chhawr thei lo an tuar zui zel a, point 12 hmuh theihna tur inkhel pali atangin point thum chiah an hlawhchhuak. Khelh li chhung ngawt an chak theih loh zawn vangin Gunners hi an ban phak tep tawha awm EPL torphy chuan a thlawh bosan fel ang hiala ngaih a ni leh ta zawk.
Champion nawn leh thei tura Arsenal hneh ngei ngei mamawh City hian an mualah bul an tan tha a, ball chang tlem zawk ni mahse game awmze nei an khel a, hlauhawm zawkah an tang. Minute sarihna lekah fuh zetin an mikhualte an nawr tlang a. Kevin de Bruyne chuan fuh taka a khalh tlang hnuin lei hrutah a pet goal a, hmahruaina goal a thun. Arsenal player palite hual vel kar atang putchhuka a, goal a thun hi De Bruyne ropuizia tilangtu a ni a. Dan theih ngei tura ngaih a dan loh vangin Gunners su nghak Aaaron Ramsdale a chetha tawk lo a tih ve theih tho bawk.
Hmahruaina goal an thun hnuin City an hlauhawm chhunzawm a, record thar siam thei dinhmuna ding Haaland a hlauhawm thei viau a, a vanneih ni a nih loh vangin Haaland hian goal a thun lawk thei lo thung. Goal a luh belh thei loh vang vang hnuin chawlhlawk dawn tep minute 45+1-ah De Bruyne free-lick chhuih tha tak chu defender John Stones chuan fuh zetin a tauh goal a, an goal hnihna a thun. Stones goal thun hi offside vangin hnawl ni zet mah se VAR rawn a nih hnuin goal ah pawm a ni leh ta zawk a, City hian si hnih faia hmahruai chungin chawlhlawk an hmang.
Chawlhlawk hnu lamah Arsenal in nawr viau thin mah se City game a nghet tha viau a, an khingpuite hmun thawl an pe tha duh lo. Inringtawk taka inlan City hi goal thun hmasa zawkah an tang zui leh a. Haaland nen fuh taka ball an inpek tawn hnuin Kevin de Bruyne chuan minute 54-naah fing takin a pet goal a, City goal thumna a thun.
Mualneitu lakah si thum fai ngawta an hnufual tawh vangin Arsenal an chak dawn lo ngei niin a ngaih theih tawh a, an player te leh an mahni tantute ngei pawh an hnual viau tawh. An hnual lutuk tur tihziaawm nan defender Rob Holding chuan minute 86-naah fuh zeta pet goal in an si phurh a sut then. Goal khat an thun vangin phur thar deuh bawk mah se an phur rei lo. 90+4-ah Erling Haaland chuan City goal lina a thun belh leh a, an chakna a nem nghet. Haaland pet hi tha thawkhat viau mahse, an goal lina an chhuah danah hian Ramsdale chu chetha tawk lo tiin a puh nawn leh theih. Goal dang luh belh lovin inkhel a tawp a. City chuan an elpui lian Arsenal chu 4-1 in an hneh a, Gunners in champion an beiseina an beng hniamsak.
An mualah hnehna pawimawh tak an chan vangin Manchester City tan champion a beiseiawm ta hle. City hian point hnihin hmahruaitu Arsenal la phak lo mah se Gunners ai hian vawi hnih ngawtin an khel tlem zawk thun a. An khelh tlem zawknaah vawi khat lek pawh an chak a nih chuan Arsenal hi an lehpel thei tawh dawn. An point hmuh inzat pawh ni se goal diference-ah an that zawk vangin City tan champion theihna kawng a inhawng zau hle.
Manchester City manager Pep Guardiola chuan an champion leh champion loh chu an kuta inghat liau liau a nih tawh thu a sawi a. An kuta chaw thleng bengbaw lo turin fimkhur taka inlan a, inbuatsaihna tha tak an neih zui tur thu a sawi.
City lakah an tlawm leh vangin Arsenal hi champion tura rin an ni tawh lova, tNext season’ an thlir leh a ngai tura ngaih a ni. Dinhmun chhe takah dingin, an boruak hniam viau mah se Arsenal manager Mikel Arteta chuan, “champion tuma inelna a la tawp fel lo va, champion thei dinhmunah kan la ding” a la ti fan thung.
Rin lawk ang ngeiin Arsenal lakah Haaland chuan goal a thun a. Haaland hian goal 33 thun tling chiahin Salah record a thaichhe fel ta a ni.