Civil Hospital Aizawl zauhna atan Aizawl PS leh Prison office dil tum

Civil Hospital Aizawl tih lenna atan Aizawl Police Station leh Prison department office chu dil an tum tih Health minister Lalrinpuii chuan a sawi. Thawhtanni atang khan Mizoram Journalists’ Association Gen. Hqrs. member-te tan Civil Hospital Aizawl (CHA) hian a thlawnin an hriselna a endik sak tan a. Hemi puala inkhawm neihah Health & Family Welfare minister chuan, CHA chu mipui nawlpui pan ber leh tih len belh ngai a nih avangin, Aizawl Police Station leh Prison department chu, Assam Rifles hmun chhuahsan tak Lammual chhehvel lama sawn phei a, CHA hmun tih len an dil dawn tih a sawi.
Mizoram Universal Health Care Scheme chu mitinin chhawr tangkai se a duh tih a sawi a. MUHCS-a la inziaklut lote chu inziaklut vek turin a sawm. MUHCS hnuaiah damloten awlsam zawka phai lam an pan theihnan ‘Simplifying Referral System’ an duang tih sawiin, he dan hmang hian sawrkar hnathawk 260 vel state pawna refer an nih tawh bakah mipui nawlpui leh pensioner pawh thahnem tak phailama refer an ni tawh tih a sawi.
Mipuiin enkawlna changtlung zawk an dawn theihnan sawrkar damdawi in thuamthat mek a ni tih a sawi bawk.
Civil Hospital Aizawl-a Cardiology Operation Theatre sak mek chu peih a nih hunah tunhmaa an tih theih loh thil tam tak an ti thei dawn a, kal thlak (kidney transplant) pawh an ti thei tep tih Health minister hian a sawi. Lung zai theihna tur ZMC&H a ruahman chu peihfel a nih hunah private hospital-a cheng nuai 8 chuang sen ngai thin chu cheng nuai 1.5 velin a zai theih dawn tih a sawi a. MUHCS-a inziaklut tan a thlawn veka tih theih a ni dawn tih a sawi a ni.