Civil Service prelim ah 344 tling

Mizoram Public Service Commission chuan Mizoram Civil Services (Combined Competitive) Preliminary Examinations 2024 chu kumin June 27 khan Mizorama Exam Centre hrang hrangah neih a ni a. Mi 3788 exam hmachhawn atangin 344 -in main exam hmachhawn turin an inhlangkai.
Preliminary exam hi then hniha buatsaih a ni a. Then khatna hi chawhma dar 10.00 ah tan a ni a, paper-I an exam. Then hnihna hi chawhnu dar 2.00 ah tanin, Paper-II an exam a ni. Paper-I hi general studies tih a ni a, paper-II chu aptitude tests tih a ni. Paper-II hi qualifying paper atan hman a ni a, 33% tal candidate-in an hmuh (score) phak a ngai. Paper-II a 33% hmu phak atang hian paper-I a mark hmu sang apiangten preliminary exam an paltlang a ni.
Mizoram Civil Services (Combined Competitive) Preliminary Exam 2024 ah hian mi 5854-in exam tumin form an thehlut a. Mi 3788 an inlan. Aizawla Centre hrang hrangah candidate 3153 awmin, Lungleiah 199, Champhai 82, Siaha 80, Kolasib 77, Serchhip 65, Lawngtlai 43, Mamit 31, Saitual 29, Hnahthial 20, Khawzawl 9 a ni.
Tun tumah hian unreserved post 33 leh reserved for PwBD (partially deaf) tan post 1 lak tur a ni a. MPSC dan hmanlai ang chuan, unreserved candidate atan hian main exam thu thei tura prelim paltlang tur mi 330 an nih laiin, a hniam lama awm mi 15 mark hmuh a intluk tlang a, hei vang hian mi 344 an tlin phah a ni. PwBD quota atanga post 1 luah turin mi pahnih tling an awm bawk.
Prelim-a tling mi 346 hian August 14 aia tlai loah main exam atan application form hranpa, MPSC office-ah an thehluh leh a ngai a, chutah chuan candidate-ten an optional paper tur leh an Exam Centre duh (Aizawl or Lunglei) an thlang ang.