Class 6 ten textbook la nei thei lo

Class 6 zirlai te chuan Mathematics, Science leh Social Sciences textbook tel lovin school an kal a ngai rih dawn a. National Curriculum Framework (NCF) leh New Education Policy 2020 behchhana National Council of Educational Research and Training (NCERT) tena Class 6 textbook an siam chu peihfel hman a nihloh vang a ni.
NCERT te chuan 2024-25 ah class 3 leh class 6 zirlai te chuan textbook thar an hmang dawn tiin a lo sawi lawk sa tawh a ni.
“Class 3 textbook chu peihfel a ni tawh a, zawrhchhuah a nih tawh laiin class 6 textbook erawh peihfel a la nih loh avangin zirlai te chuan an la nei thei lo a ni” tiin Ministry of Education (MoE) official te chuan an sawi a. Zirlai te hian thla hnih chhungin textbook te hi an neih hman a beisei thu a sawi.
Nikum July thla khan MoE chuan Class 3 atanga 12 textbook tur ruahman turin National Syllabus and Teaching Learning Material Committee (NSTC) a lo din tawh a. MoE chuan kumin February thla khan grade tin tena thlasarih chhunga NSTC tena an ruahman textbook thar an neih ngei theih nan ruahmanna hautak zet a kalpui a ni.
A hnuah an hunbi buk chu siam tha in kumin academic year-ah class 3 leh 6 ten textbook thar nei phawt se an ti leh a. Mahse, NCERT chuan NTSC atangin Social Science, Mathematics leh Science textbook class 6 te tana ruahman chu a la dawng lo. NTSC tena an peihfel veleh NCERT hnenah pe-in an print zui thei mai dawn a, ni 10 atanga 15 chhunga peihfel mai theih a ni thung.
Tun dinhmunah chuan Class 6 zirlai te chuan subject pathumah textbook an nei rih lo va, a chhan chu NCERT te chu syllabus hlui print tawh lo tura tih an nih bawk si vang a ni. Online-ah pawh English, Hindi leh Urdu te chauh download theiha siamin a awm bawk.
“Zirlaibu hlui kan hmang thei lo va, zirlaibu thar tur kan la dawng lo bawk a, chuvangin class 6 zirlai te chu lai takin an awm mek a ni. Zirlai te hnena zirlaibu thar pek theih nan hian thla hnih vel hun mamawh a la ni ang” tiin official te chuan an sawi.
MOE te chuan Social Science subject lehkhabu pathum – ‘Our Pasts’ (History), ‘Our Earth: Our Habitat’ (Geography) leh ‘Social and Political Life’ (Political Science) te chu bu khatah siam a ni mai thei a ti a. Mahse, thuchiang a la awm thei lo va, NSTC te chuan NCERT te hnenah publication tur draft a la pe tlat lo a ni.
Class 3 tan bik chuan English, Hindi, Urdu, Mathematics, Environmental Education leh Arts te chu print meka semchhuah mek a ni tiin official te chuan an sawi.
Nikum November thla khan Ministry chuan Class 1 atanga 12 hman tur NCF behchhanin syllabus revised a textbook thar chu hman a nih tur thu an lo puang tawh a. A hnuah NCERT chuan class 3 leh 6 chauhin textbook thar an hmang ang a ti leh a. Official te chuan NSTC chuan pawl sang zawk te textbook tur chu hmanhmawh taka siam a duh loh vang an ti a ni.
NSTC board-ah hian M.C. Pant, chancellor of National Institute of Educational Planning and Administration, professor Manjul Bhargava, Princeton University, Sudha Murthy, chairperson of Infosys Foundation, music maestro Shankar Mahadevan, leh Bibek Debroy, chairman of the Prime Minister’s Economic Advisory Council te pawh an tel a ni.
Tihian kum 1990 hnua NCERT textbook siamthat tum li-na a ni tawh bawk a. Kum 1990 chho-ah textbook siamthar hmasak ber a thleng a, chumi hnuah kum 2002 leh 2004 ah NDA sorkar Atal bihari Vajpayee kaihhruaiah siamthat leh niin ‘pro-Hindutva’ bilh tel zel a ni a. A tum thumna chu Congress sorkar laiin kum 2006 leh 2008 khan siamthat leh a ni bawk a.
Kum 2014 a NDA sorkar a pian hnu khan a thawh li nan siamthat tuma hmalak leh niin tum thum revision neih hnuah NSTC hmalakna in kalpui a ni leh ta mek a ni.