CM car thar neih dan turah dan dinglai an pawtfan nasa
- MNF party
CM car thar neih dan turah dan dinglai an pawtfan nasa
- MNF party
Chief minister car thar neih danah sawrkar dan dinglai pawhfan leh zawm loh a awm tih MNF chuan an sawi.
MLA inthlan campaign laiin Pu Lalduhoma hian ‘ZPM chief minister chuan car pakhat bak a mamawh dawn lo, ZPM chief minister chu car man toah a chuang ve dawn lo’ tih thu vawi tam a sawi bakah chief minister atana lakluh ni-a chanchinbumite a kawmnaah ‘Minister tinten motor thar kan lei dawn lo, kei pawh tiamin…’ tih a sawi nawn thu MNF Publicity Board member Lalremtuata Chhangte chuan a sawi.
“Hun reilote chhunga a thutiam bawhchiaa car man to, cheng nuai 30 man vel, sawrkar dan dinglai pawtfan chung lehnghala a lei leh si hi thil zahthlak tawp a tling a, mipuiin an rin chhunzawm theih tawh loh tur a ni,” a ti.
Chief minister hian kumin June 17 khan Rs. 29,79,000 man, Toyota Innova Hycross a lei thar a. A thutiam a bawhchhiat avanga mipui lam atanga sawiselnaah ngaihdam dil a hneka ZPM party thupuangtu hmanga a insawifiah dan chu Zoram mipui engahmah a ngaih lohna leh hmuhsitna a ni tih MNF hruaitu hian a sawi.
Mizoram sawrkar dan dinglai, GAD office memorandum (2016 June 28) a tihchhuahah, chief minister tan hian car cheng nuai 15 man aia sang lei phal a ni loa, tuna chief minister car thar nuai 30 man deuh thaw lei thei tur hian dan dinglai chu a bik taka pawh fan (relaxation) ngai niin, dan dinglaiin a phal chin aia to daih lei thei tur hian GAD chu 2025 April 24 khan dan dinglai pawhfanna thupek siamtir a ni tih a sawi a ni.
Sawrkar dan dinglaiah ‘sawrkar lirthei lei thar reng reng a var (white) emaw off white emaw a ni tur a ni’ tih a nih laiin, chief minister car lei thar chu a dum (black) a ni leh bawk tih MNF general secretary Lalremruata Chhangte hian sawiin, “Sawrkar lirthei reng reng mimal hminga register loin, sawrkar hnathawkte designation anga register thin a nih laiin, CM car lei thar hi mimal hminga register a nih lehzel a, he car thar lei dan hrim hrim hi a ngaihthat thlak loh,” a ti.
Kuthnathawktute sawhthing man tam tak batsak mek lai leh, kum thum vel chauh la hman car chak tha tak a kawl sa reng lai, cheng vaibelchhe tam tak ba nei tun chunga nuai 30 man vel car ‘a to lo’ ti tlattu chief minister-in kalphung thar kawng min zawhpui mek chu tlakranna kalphung a ni tih a sawi bawk.