CM-in dinna tur bial a la hre lo – CLP leader

CM-in dinna tur bial a la hre lo
– CLP leader
MNF president, chief minister Zoramthanga chuan MLA inthlanah dinna tur bial a la hre lo niin Congress Legislature Party leader Zodintluanga Ralte chuan a sawi.
CADC inthlan campaign-a a kalnaah thu sawiin Congress MLA hian state pum inthlanah MNF a sawrkar dawn lo nia sawiin, “MNF party an sawrkar loh tur zia lanna chu, an president Pu Zoramthanga’n dinna tur bial a la hre lo hi a ni,” a ti.
CADC inthlana candidate pakhat leh Manipur buainaa nunna chante sunna hun an hman zawha thu a sawinaah Manipur-a chi leh chi inkara buaina chhuak avanga Zohnahthlakte tanpuina tur kawngah engtik lai mahin Congress party a tlanchhe ngai dawn lo tih a sawi.
“Congress party hi remna leh muanna duhtu party kan ni a, kan ramah pawh kum 20 buaina namenlo hnuaia kan awm hnu ah remna leh muanna a awm theihna’n Congress sawrkar namthluin lalthutthleng kan kian a. Mizoram mai ni lo, hmarchhak state hrang hrang leh India ram pumah remna leh muanna awm se, ram chhunga cheng mipuite inngeih leh inlungrual taka khawsakho hi kan duh ber a ni,” Zodintluanga hian a ti
MNF party innghahna chu sum a ni, tiin, sawrkar hnathawk hlawh pek mumal theih loh laia suma mi lei an tum chu zakthlak a tih thu te, an sum sem hi mipui sum a nih thu te a sawi. State-a Congress a sawrkar chuan District Council a buai ngai loa, Congress a sawrkar loh chuan ‘musical chair’ ang mai a ni thin tih a sawi bawk.
Kalphung thar zuartu ZPM chuan kalphung hlui an la nei lo hrim hrim tih sawiin, “An zawrh ber chu, ZPM hruaituluten Chakma vote an mamawh loh thu te, Chakma vote tel loa sawrkarna an sawi laia, vote dila Chakma khaw hrang hranga ZPM leader a kal chu nuihzatthlak a tih thu te a sawi.