Intodelhna in hnam zahawm a siam
– Supply minister
Intodelhna chuan ram leh hnam zahawmah a siam tih Supply minister K Lalrinliana chuan a sawi.
Kolasib College Veng YMA Hall a hawnnaah bialtu MLA, minister K Lalrinliana chuan, mahni phak tawk theuha intodelh tur a hma lak a tul tih sawiin, zirlaiten thiamna chhawrtlak nei a, taimakna leh tumruhna nen kan ram chu kawng engemaw tala intodelha siam turin ruahmanna an neih a pawimawh tih a sawi. “Kan ram leilung hausakna haichhuahna kawngah te, a humhalh kawngah leh chenna nuama siam tura hmalakna kawngah tan lak tlan a tul a ni,” a ti.
College Veng YMA Hall Kolasib sak puitlin a nih theihna’na sawrkar atanga tanpuina piahlama khawtlangin sum leh tha an thawhna chu entawntlak a tih thu a sawi a. Thalaite hriselna’n leh infiamna kawnga hmasawnna sawt lehzual a awm theihna’n khelmual tha a awm a tul thu leh khelmual neihsate changtlung zawka chei a nih thu te a sawi bawk.
Hall sakna hmun hi MP a nih laia Vanlalzawma hmalakpuinaa lei a ni a, a hmun lei belhna’n leh a sak chhunzawmna’n chhungkaw tin atangin hmanrua leh remchan dan angin sum thawh thin a nih bakah bialtu MLA K Lalrinliana kaltlangin MLA fund cheng nuai 10 hmuh a ni a. Hall sak bultanna tur hian Kolasib bialtu MLA hlui PC Zoramsangliana (L) kaltlanga MLA fund leh tanpuina dang atangin cheng nuai 25 hmuh a ni a, hnatlang leh mi inphalten sum, tha leh khawl thawhin, sawrkar office hrang hrangin an pui bawk.
Intodelhna in hnam zahawm a siam – Supply minister
Get real time updates directly on you device, subscribe now.