CM-in February 20 thlirlawk

CM-in February 20 thlirlawk
Sawrkar ruahman lawk angin February 20 atangin Secondary Collection Centre (SCC) cum Auction Centre ah sawhthing hralhchhuah runpui neih tan a ni dawn tih chief minister chuan a sawi.
Chief minister Lalduhoma hian a social media acccount kaltlanga thuchah a siamah, sawhthing hralh tan ni ah hian sawhthinga sumdawngte tel vek turin a sawm a; auction chu Rs.50 atanga tan tur a ni, tiin, District Agricultural Marketing Committee (DAMC) leh coordinator bakah SCC-a duty-ten a tul angin an buaipui dawn tih a sawi a ni.
Thudawn danin, February 20 atanga sawrkarin sawhthing lei tan a tumnaah hian cluster hrang hranga lei sak dan tur hi ruahman lawk niin, February 20 hian SCC huamchhunga khua zawng zawng tual nghal loin lei sak dan tur hun an bituk lawk a. A ni tahtawlin khaw tina lei sak theih zat tur pawh duan lawk a ni.
Hetihlai hian Mizoram State Rural Livelihoods Mission (MzSRLM) hnuaia din Ropuiliani Women Farmer Producer Company Limited tharchhuah sawhthing metric ton 10 hi, inremna an lo siampui tawh angin Reliance Retail Limited chuan state pawna hralh dan a dap sak a. February 14 khan Kolkata-a phurh thlak turin Sailam leh Chamring khaw mite sawhthing thar, metric tonne 10 chu an thawnchhuak a ni.