CM-in sawhthing lei a hautak tih sawi

Mizoram chief minister Lalduhoma’n sawhthing lei a hautak tih a sawi a, sawhthing lei dan hi tihdanglam a ngai mai thei tih a sawi. Inhriatthiamna pawh a dil lawk. Budget Session neih mekah Zirtawpni khan larsap thusawi sawihonaah chief minister hi house leader a nihnain member-te thusawi zawhah a hmawrbawktuah a tang a, sawhthing lei a hautak thu hi a sawi a ni.
Sorkarin February ni 20-ah sawhthing hi a lei tan a, Lalduhoma, house leader chuan a hautak thu hi sawiin, kg-ah Rs 50-a an lei hian, tunlaiin India rama a man hi kg-ah Rs 30 nia a hriat thu a sawi. “Tuna kan lei dan hi a hautak em em mai a ni. Kg-ah Rs 20 chu ka lo lost ta a,” tiin hemi chungchang hi a sawi.
Loading-ah kg-ah Rs 3 an seng a, sai ip Rs 10 man an tum bawk tih a sawi a, “Sorkar senso hi a hautak dawn lutuk a,” a ti.
“Hei hi chu kan tlin bik lo mai awm mang e aw kan ti a, en that te pawh a ngai mai thei a,” tiin, Zirtawp zanah an thukhawm dawn tih a sawi a, “Tlema sorkarin ruahmanna dang a lo siam a nih pawhin, hengah hian insawisel lovin inhriatthiam tlanna ka’n ngen nghal bawk a ni,” a ti.
Hmunphiah chungchang pawh a sawi a, “Hmunphiah bik hi, a hring lei kan intiam lo,” a ti a, a thartute’n pho ro lovin a hringin an hralh thin tih sawiin, “Tlawm deuh hian a hringin an lo dek ral leh mai thin a. A ro lei tur hi a tam lem lo a,” a ti.
“Tuna an hralh bang ang zawng zawng hi kan lei vek dawn. A vaiin kan lei dawn tho,” tiin hmunphiah chungchang hi a sawi.