CM-in thudik tawk lo a sawi thin – Ramthanmawia, MLA

Chief minister Lalduhoma chuan thudik tawk lo sawi hmiah hmiah thin niin MNF MLA Ramthawnmawia chuan a sawi.
Thawhtannia MNF office-a inkhawmah MLA Ramthanmawia chuan Assembly Session neih zawh tak chungchang sawiin, thla 8 sawrkar chu mipuiin an hre tan mek a. Pawn lam atanga an insawi ang ngawt a ni lo tih anmahni ngei pawhin an inhre chho mek tih a sawi.
Assam Rifles sawn chungchangah CM-in AR leh Mizoram sawrkarin MoU hran ve ve an ziak angin House-ah a sawi a. RTI chhannaah erawh AR-in MoU an duang a, sawrkarin a lo endik tih a ni thung a. CM-in a thusawi a dik zawk a ti chu RTI zahawmna tih bawrhbanna a ni tih a sawi. “Minister-te an inzir peih lo. An flagship program chungchang zawhbelhna pawh an chhang hleithei lo,” a ti.
Kumin Independence Day-ah CM-in electric man ba an pe tla vek tawh a, rebate cheng vaibelchhe 35 chuang an hmu let zawk nia a sawi laiin, Assembly Session-a a zawhna chhanna chu ‘Electric bill ba cheng vbch. 134.90 a awm thu a ni tih a sawi.
“SASCI sum cheng vbch. 500 min pe tawh a tih pawh, ka zawhna chhanna chu, kumin August 14 thleng khan release order kan la dawng lo tih a ni. Kan chief minister hian thudik tawk lo hi a thudik sawi hmiah hmiah thin,” Ramthanmawia hian a ti.
MNF sawrkar laia Covid vanga sum puk sawiseltuten tunah hian cheng vbch. 2046.19 an puk tawh niin a sawi a. Chhiah an tipung zel dawn a, mipui an hrek chho dawn niin a sawi bawk.